Latest

3 priso nagadan, 1 nakadulag guiraray sa Masbate



MASBATE CITY (Bicol Standard) -- An tulo kan apat na detenidong priso na nakadulag sa Masbate Sub Provincial Jail kasuodma (Hunyo 10) an nagadan kan sinda makibadilan sa mga tawohan kan gobierno kasuodmang alas 5:30 nin hapon.

Nagadan an tulo na an pangaran iyo si Bryan Basulgan y Gracio, 22 anyos, soltero, residente kan Barangay Cabas-an, Aroroy, Masbate, asin akusado sa casong pagbalga sa R.A. 10591 asin R.A. 9516; Jose Jeven Fuentes y Balasa, 30 anyos, soltero, taga Baragay Calasuche, Milagros, Masbate, akusado sa casong Rape (6 counts); asin Richard Espayos y Albante, 37 anyos, may agom, residente kan Barangay Cayabon, Milagros, Masbate, akusado nin Rape (6 counts).

Nagadan sinda sa Barangay Bonbon, Milagros, Masbate.

Segun sa report na hale sa Masbate Sub Provincial Jail, mientras na naggigibo sinda nin manhunt operation sa contra sa apat na nakadulag na priso, hale sa Masbate Provincial Jail kan Hunyo 9, 2020,
pinaputokan kan mga akusado an operating team, kaya sinda nagbalos.

An saro sa apat na nakadulag na akusado, nakadulag man guiraray sa sinambit na operasyon.

Nakua sa pinangyarihan kan incidente an sarong 12 guage na homemade shotgun na may carga nin magazine na may tulong live ammunition asin sarong fired cartridge para sa pareyong calibre nin badil.