Nicanor Faeldon Jr., negative sa pag gamit nin droga - PNP Naga

NAGA CITY - Ipinahayag ni SPO2 Tobias Bongon, an spokesman kan Naga City PNP, na nagluwas na si resulta kan drug test na ginibo sa apat na personas na nasa laog kan residencia ni Russel Lanuzo, a.k.a "Bubbles," na iyo an subject kan search warrant kasuodmang aga.

An sinambit na residencia, segun ki Police Sr Supt Felix Servita Jr., haloy nang ginagamit bilang drug den sa Brgy. Mabolo, Naga City.

Base sa resulta kan drug test, si Nicanor Faeldon Jr., an aki ni BuCor Chief Nicanor Faeldon, negatibo sa drug test, sabi ni SPO2 Bongon, ngonian na aga.

An tulong iba pa na pina drug test iyo sinda Allan Valdez, 44, taga Sampaloc, Manila, asin Manuel Nebres, 39 anyos na taga Mabolo, digdi, an anas positibo sa pag gamit nin droga.

Nin huli kan siring na resulta kan drug test dai na kabale si Faeldon Jr., sa mga sasangatan nin caso sa pagbalga kan R.A. 9165, sabi kan pulis.

Maromdoman na kasuodma, sinabi ni BuCor Chief Nicanor Faeldon na mademiter siya sa puwesto bilang pamayo kan Bureau of Corrections kun magluwas na an saiyang aking si Nicanor Jr. magpositibo sa drug test.

Read More

Faeldon Jr., dakop sa Naga City sa drug raid

NAGA CITY--Nagpahimutik si Nicanor Faeldon Jr., aki kan pamayo kan Bureau of Corrections (BUCOR) na si Nicanor Faeldon, na dai siya imbuelto sa maski anong transaksyon sa illegal na droga digdi.

Si Faeldon Jr., 32 anyos, college student sa Taytay, Rizal kaiba sinda Allan Valdez, 44 anyos, taga Sampaloc, Manila asin Manuel Nebres, 39 anyos, taga Mabolo, Naga City an nadakop kan mga awtoridad.

Si Faeldon Jr., binitbit kan pulis kasubagong pasado alas 5:00 nin mag-omagahon ta nasa  laog siya kan harong ni Russel Bermudo Lanuzo, alyas "Bubbles" na iyo an subject kan search warrant asin consideradong "high value target" sa operasyon kan illegal drugs digdi.

Dating empleado si Lanuzo kan Metro Naga Water District digdi.

Pig serve kan pulis an Search Warrant sa pig eestaran na residencia ni Russel "Bubbles" Lanuzo, sa Mabolo, Naga City antes maglinawag an aldaw ngonian.

Sabi ni SPO2 Tobias Bongon, an spokesperson kan PNP Naga, sa BICOL STANDARD, si Faeldon Jr., ipapa drug test ngona para sierto kun siya nag gagamit nin droga o dai.

Mientrastanto, naaraman sa mga imbestigador na si Faeldon Jr., ka relasyon kan aki ni Lanuza na si Xandra Mae Lanuzo, kaya duman siya nag turog sa harong kan babae.

Kabale sa dinara sa pulis station No. 1 iyo si Xandra Mae Lanuzo.

Si Xandra nagpuli pa sana sa Naga City kan Mayo, 2018, kaiba an saiyang live-in partner na si JR tangani na mag eskwela guiraray.

Sa presente, naka enroll suboot si Xandra sa Ateneo de Naga University asin nag tatrabaho bilang student assistant.

Durante kan pag implementar kan search warrant, may mga nakuang pig tutubodan na shabu sa lugar asin iba pang drug paraphernalia.

Idinagdag ni SPO2 Bongon na hinahalat ninda an resulta kan drug test ngonian.

Dai pa nakontak si Nicanor Faeldon, an ama ni JR para mahagadan nin reaksyon dapit sa baretang ini.

Si P/Supt Errol T. Garchitorena Jr., an namayo kan grupo kan mga awtoridad na nagserve kan search warrant contra ki Lanuzo. 

Read More

3 lalaki tiklo sa drug raid sa Legazpi City

LEGAZPI CITY - Tulong suspechado na imbuelto sa pagtinda nin illegal na droga an dinakop kan mga tawohan kan Philippine Drug Enforcement Agency (PDEA) kasuodma.

Nahulog sinda sa kamot kan mga awtoridad sa ginibong illegal drug operation sa coastal na barangay digdi.

Segun sa pahayag ni Christian Frivaldo, acting director kan PDEA-Bicol, an mga suspechado iyo sinda Michael, James, asin Paul, na gabos may apelyedong Decano, asin mga residentes kan Barangay San Roque, digdi.

An total na valor kan illegal na droga na na kua sa sainda carculadong kantidad P178,000.

May darang search warrants an mga ahentes kan PDEA kan mag laog sa pig ookupar na lugar ninda James, Michael asin Paul.

Ginibo an operasyon kan PDEA alas 6:00 nin aga, kasubago. 

Nakakua an mga awtoridad nin 27 gramos nin shabu sa lugar na ginibo an pig implementar na search warrant.

An mga suspechado gabos dinara sa detention cells mientras na pig hahanda an pag sangat nin kaso contra sa sainda.

Hasta sa presente, an PDEA nagpapadagos kan saindang mayong hotahot na operasyon sa mga lugar na pig tatagoan kan mga nagpapabakal nin droga asin mga para gamit kaini.

Read More

"Double dead" na karne, nakumpiscar sa Naga City

NAGA CITY - Pinatanidan kan mga official kan Ciudad nin Naga an mga mabakal nin carne na pasegurohon na fresko pa an mababakal ninda, orog na ngonian na masunod na mga aldaw.

Segun sa informasyon, an Naga City Price Monitoring and Coordinating Council, na pinapamayohan ni Consejal Ray-An Cedrick Rentoy, biglaan na nagconducir nin pag inspection kan mga tindahan nin carne para maheling an kalidad kan saindang mga tinda.

Pakalihis nin pirang oras na paglibot sa mga meat shops, nadiscubre kan sinambit na team an mga "double dead" o "botcha" nang mga carneng orig na pig titinda.

Tulos nag sugo sa mga miembros kan team na compiscaron an mga paninda, na nag aabot sa 276 kilos gabos na "doble dead meat."

Afuera kan pag compiscar kan mga panindang carne, pinatanidad gabot na mga paratinda na dai nangad mag probar na magbalga kan reglamento kan ciudad dapit sa saindang mga paninda, nin huli ta may kastigong pwedeng ipataw sa sainda.

Pig lalaoman na magiging segido an pag inspection kan mga tindahan nin carne orog na ngonian na madali nang mag pasko na kun saen dakul na mga parabakal an pig lalaoman.

Read More

Bula PNP dai pa aram kun saen dinara an pig kidnap na babae digdi

BULA, CSur-- Mayo pa nin lead an Bula PNP sa nangyaring pag kidnap ki Judy Asaula y Juelas, an agom ni Philbert Asaula y Guerinia, na dinara kan mga armadong lalaki na nag-surong sa saindang residencia sa Brgy. Palsong, digdi.

Segun ki PSI Reynaldo Balindan, OIC Chief of Police kan Bula, nagpapadagos an saindang paghanap sa biktima na nawawara poon pa kan sarong bangui.

Nakikipag coordinar man an pulis digdi sa agom ni Judy Asaula, na si Philbert na igwa man nin tama nin bala sa saiyang kamot, pakatapos na badilon kan dai nabistong mga armadong lalaki.

Sinabi ni Balindan sa BBS news na si Philbert pig bubulong ngonian sa hospital, sa luwas kan Camarines Sur.

Mientrastanto, an mga pag taraid na police stations kan Bula an anas na man na isi an sinambit na krimen, asin nakikipag tabangan sa Bula PNP.

Naghahanap pa nin mga informante an pulis, na pwedeng makatabang sa pagsusug kan mga suspechado.

Sa presente, tinatawan kan mga awtoridad nin importansya an mga lugar na may CCTV na pwedeng nakakua kan retrato kan pangyayaring ini.

Maroromdoman na binitbit si Judy Asaula kan mga armadong lalaki pasado alas 12 nin matanga kan sarong bangui, hale sa saindang barangay sa Palsong.

May mga nasagap na informasyon na pwedeng may relasyon sa treasure hunding an pag kidnap sa biktima.

Habo pang magtao nin detalyadong informasyon an mga pulis tangani na dai maka-affectar sa saindang pag siyasat.

Read More