Wednesday, April 25, 2018

3 katawo, kabale an suldados asin security guard, dakop huli sa gun ban sa Albay


ni Vince Villar

Ligao City, Albay (Bicol Standard) - Arestado an tulong lalaki,kaiba an sarung suldados asin saru pang security guard sa syudad nin Ligao, Albay, kasubanggi huli sa pagbayular kan mga ini sa ipinapautob na election gun ban asin illegal possession of ammunition.

Sa report kan Ligao City Police Station, binisto an mga naarestar na sinda Jaymar Mora y Madaraog, 28 anyos, Security guard; Celso Mora y Ortile, 23 anyos, paraoma asin Jeffrey Mora y Magdaraog, 29 anyos, soltero, miembro kan Philipine Army na naka assign sa 92nd Division Recon Company sa Brgy. Paulba, Siyudad nin Ligao, gabos residente kan Brgy Cabraran Grande, Jovellar, Albay.

Segun sa report, alas 10:25 kasubanggi kan magreport si Brgy Captain Dexter Tuazon kan Sta Cruz sa naunambitan ng syudad sa mga pulis na igwa nin tulong mga persona na sakay nin motorsiklo na nagpaputok nin badil asin duminulag pasiring sa direksyon kan banwaan nin Oas.

Tulos na nagsagibo nin hot pursuit operation an Ligao CPS asin naarestar an  na nagresulta nin pagkaka arestar sa sinambitan na mga persona. 

Narecover sa sainda an Armscor caliber 45 asin an motorsiklo na ginamit sa pagdulag.
Share:

Sunday, April 22, 2018

3 dating official kan DPWH Bicol, kinasohan sa Sandiganbayan


MANILA -Tulong dating official kan DPWH Regional Office sa Bicol an sinangatan nin casong pagbalga sa Anti Graft and Corrupt Practices Act huli sa sahot na maanomaliyang contrata sa pagpa-arkila kan mga vehiculo kan department.

An mga kinasohan kan Office of the Ombudsman iyo sinda dating DPWN Regional Director Eleno Colinares Jr., district engineer Gilbert Olfinco asin treasurer Teresita Demabasa.

An casong isinagat contra sainda sa Sandiganbayan iyo an pagbalga kan Sec 3 (e) kan RA 3019, o an Anti Graft and Corrupt Practices Act.

An kaso ipig sunad sa Sandiganbayan kan Abril 6, 2018.

Si Lioson Cime an pinangaranan na respondent sa casong ini.

Segun sa akusasyon sainda kan graft investigation and prosecution officer na si Maricel Quilates, an mga dating DPWH officials naglaog sa contrata ki Cribe poon kan Marso 1999 hasta Abril 2002, sa kantidad na P899,178.

Sabi kan mga imbestigador kan Ombudsman an nasambit na contrata dai awtorisado kan DPWH asin mayo nin budget appropriation.

An Ombudsman nag rekomendar nin fianza na kantidad P30,000 an kada saro sainda.
Share:

Nan-siko nin pulis sa check point, binitbit sa presinto


SORSOGON CITY – An empleado kan sarong hospital digdi an pwedeng mag atubang nin casong Direct Assault asin disobedience upon a person in Authority, pakatapos na sikohon niya an pulis na nadistino sa check point, digdi.
Sabi sa report, si Aldin Caubang, pinara kan mga pulis mantang sa lindong kan Oplan Sita, na parte kan security measures na ginigibo sa lugar.

An incidente nangyari sa Barangay Salog, mantang an imbueltong mga awtoridad distino sa Precint No. 2.

Base sa report, kan pinara si Caubang para sa regular na ginigibong pag inspection sa mga nag-aaging vehiculo, dai siya naka presentar kan papeles kan itom na motorsiklo na saiyang pig mamaneho na mayo nin plaka.

Maisog na naki suway si Caubang, nagsayuma na magpaheling nin maski anong pwedeng pagkabistohan saiya, asin agresibo pang siniko si PO2 Annabelie Constante, na tinamaan saiyang toong takyag.

Nin huli sa pakisuway sa mga pulis, binitbit lugod siya sa hepatura kan pulis tangani na imbestigaran asin sangatan nin magkakanigong asunto criminal.
Share:

Pulis, gadan sa aksidente



NAGA CITY – Mayo na nin buhay kan makaabot sa hospital si PO1 Jhun Jhun Pastorco, 29 anyos, na biktima nin aksidente sa Gov. J. T. Fuentebella highway sa Barangay Ayugan, Ocampo, Camarines Sur.

Si PO1 Pastorco nakalunad sa motorsiklo na nakabudal sa truck na naka pondo sa tahaw kan tinampo, pakatapos na mag abereya an makina.

Sabi kan imbestigador, posibleng dai narisa kan biktima an truck na pig mamaneho ni Roberto Hermogenes ta mayo nin early warning device sa likodan kan raot na vehiculo.

Pag abot sa hospital sa Naga City, ipig declarar kan hospital na dead on arrival an nadisgraciang pulis.

Pugol kan mga awtoridad an driver kan raot na truck, mientras na pighahalat an pag sangat sa saiya nin kaso.
Share:

“Shabu” kantidad P300,000.00 nadakop sa Naga City



NAGA CITY 4/21/18 (BICOLSTANDARD) – An mayong hotahot na kampanya kan mga miembros kan Philippine Drug Enforcement Agency (PDEA) sa Camarines Sur na pinamayohan ni Agent Vidal DC Bacolod an nakadakop na naman nin saro pang pusikit na paratinda nin druga kasubagong aga, Abril 21.

Si Ronald Patasin y Besmonte, dai naka palag sa mga tawohan kan PDEA sa tabang kan mga pulis na nagsakyada sa saindang lugar sa Zone 1, sa Barangay Triangulo digdi.

An shabu na nadakop hale ki Patasin nasa laog kan sarong silag na plastic bag, na carculadong may gabat na 50 gramos.

Kun ipapabakal nin tingi-tingi, pwedeng aboton na P300,000.00 an kantidad kaini.

Afuera kan sarong bulto nin shabu, narecover pa kan mga awtoridad an cuarta na ginamit bilang buy bust money hale sa poder kan suspechado.

Si Patasin saro sa mga supplier nin shabu digdi na haloy nang pig susunod kan mga ahentes kan PDEA.

Pig pepreparar na ngonian an magkakanigong kaso na isasangat contra sa saiya.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...