Dating Municipal Councilor, gadan sa raid kan PDEA asin PNP sa Sorsogon

• Ni Vince Villar

Matnog, Sorsogon – Kinumpirma kan liderato kan Philippine Drug Enforcement Agency o PDEA Regional Office an pagkagadan kan sarung dating Konsehal asin nagsirbi man na Municipal Administrator kan banwaan nin Matnog, sa probinsiya kan Sorsogon, matapos na ini suboot manlaban sa mga operatiba na makundusir kuta nin search warrant impelementation sa saiyang pigrerentahan na residensiya kan nakaaging Domingo, Marso 11, 2018 sa Sorsogon City.

Binisto an nagadan na si Edgar Gardon y Ricaforte, 55 anyos, na naging municipal administrator kan banwaan nin Matnog kan mga nakalihis pang administrasyon.

Sa intrivista kay PDEA Bicol Regional Director Christian Frivaldo, bandang alas 7:15 nin aga kan Domingo kan ikasa kan pinagsarong pwersa kan PDEA Sorsogon, PDEA RO5, Sorsogon City asin Sorsogon Police Provincial Office - Provincial Intelligence Batallion an search warrant kontra sa suspek sa saiyang pigrerentahan na residensiya sa Monreal street, Sorsogon City, alagad nanlaban ini sa mga awtoridad, rason ngani mabadil ini sagkod magadan.

Narecover sa sinambitan ng operasyon an duwang plastic bags na may laog nin pigtutubudan na shabu, na may gabat na maabot sa kabangang kilo asin pigkakarkulong may kantidad na P3 million.

Nakua man an nagkapirang badil, live ammunitions, nagkapirang puminutok na basyo asin na-deform na mga bala.

Nasa Regional Crime Laboratory pa ngonyan an nakuang pigsususpetsarang Shabu ngani matesting ini.