Latest

Biktima nin online scam sa Naga City, nagdadakol


NAGA CITY — Nakasentro na an atensyon kan Cybercrime Unit kan Naga City Police Office sa padagos na pagdakol kan caso nin online scam digdi.

Segun sa informasyon, nagparadakul an nagrereclamo sa pulis, alagad mayoriya an habo nang magparecord sa supog na maaraman kan publiko na sinda naloko sa popular nang maray na online scam.

Si Lea Sancha, miembro kan PNP digdi asin iyo an spokesperson kan Cybercrime Unit kan NCPO, nagsabi na an saro sa halimbawa kaini iyo an dai pag-abot kan mga pig-oorder online.

Pakatapos na bayadan an binabakal na bagay sa negosyong online sa paagui kan bank financing, dai nakokontak an ka transaction.

An iba digdi naggagamit nin credit card asin nagdedepositong cuarta sa account kan binabakalan ninda kan producto.

Preparado na an PNP digdi na maglansar nin entrapment operation sa mga imbuelto sa panloloko.

Inako ni Sancha na difisil an pagdakop kan mga imbuelto sa arog kaining transaksyon, alagad igwa na sinda nin mga paagui.

Guiraray nagpaguiromdom an pulis na antes mag-iyo asin magbayad sa transaction online, seguradohon na lehitimo an saindang linalaogan na transaction.

Afuera kan online scamming, usong maray ngonian an pag pa-record kan cyber libel, extortion asin sextortion cases.