Latest

Produksyon kan abaca sa Bicol, nagbaba


NAGA CITY—Nin huli sa pandemya asin sa surunod na kalamidad, sinabi kan Fiber Industry Development Authority digdi sa Bicol na nagbaba na maray an production kan bandala sa rehiyon.

Si Mary Ann Molina, an Director Regional kan PHILFIDA, nagsabi na nanotaran ninda an hababa na production kan bandala o abaca fiber sa Albay, Sorsogon, Camarines Norte, Catanduanes, asin sa Camarines Sur.

Segun na tiniripon na record kan production, an Albay nagkaigwa sana nin 16.73%, Camarines Norte, 5.05%, Catanduanes 15.45%, asin Sorsogon 51.37%.
An Camarines Sur daeng gayo naafectaran an production, alagad naghuros pa man guiraray an naproducir na bandala kan nakalihis na taon.

Mientrastanto, an Catanduanes pa man guiraray an nagtao kan pinakadakulang supply nin bandala sa bilog na nasyon kan taon 2020.

Sabi sa report, an Catanduanes iyo guiraray an numero uno pag-abot sa abaca production sa Pilipinas, maski tinamaan nin mga bagyo asin nagsasakit pa man guiraray sa efecto kan pandemya.

An islang provincia kan Catanduanes an binabansagan na "abaca capital" sa bilog na Pilipinas, ta dakula an volume kan saindang production.

Maski tinamaan nin surunod na kalamidad, an Bicol piglalaoman na makakabangon guiraray, nganing mag supply nin dakul na bandala ngonian na taon.