Latest

Biyahe palaog, paluwas kan Naga, dai pigrerekomendar kan HERTF

Retrato hale sa Naga City Government

NAGA CITY (Bicol Standard) -- Dai pigrerecomendar kan Naga City COVID-19 Health Emergency Response Task Force (HERTF) an anuman na biyahe palaog o paluwas sa ciudad na ini, sa irarom kan ipinaluwas na Policy No. 09 kan fecha 17 kan Disyembre.

Segun sa anuncio, suspendido an pag-issue kan Travel Health Certificate sa City Health Office asin Travel Authority sa Naga City Police Office poon December 23 hasta January 3, 2021.

An issuance kan Travel Acceptance Certificate suspendido man poon December 23 sundo 27, December 30 asin 31, 2020 asin January 1 to 3, 2021.

Si mga boot magbiyahe hale sa luwas kan Bicol region asin maabot sa ciudad nin Naga sa pagoltanan kan December 23, 2020 hasta January 3, 2021, kinakaipuhan mag-apply para sa letter of acceptance bago o sa aldaw kan Disyembre 21, 2020.

Mientrastanto, pigpapagirumdom an publiko kan iba pang reglamento na nakalaag sa Policy No. 9.

Sabi digdi:

Nin huli sa piglalaoman na paglangkaba nin kaso nin COVID-19 ngonian Kapaskuhan asin Bagong Taon segun sa mga pag adal kan DOH:

1. Bawal po nguna an 14 años pababa na magpasiring sa mga establishemento komersyal asin simbahan, apwera kun an rason medikal, emerhensya o bubunyagan.

2. Sagkod 50% lang kan venue capacity an mga pagtiripon na igwa nin pag utob sa minimum health standards

3. Obligado na an pagsulot nin full coverage face shield asin facemask kun mapasiring sa mga lugar na dinudumanan nin mga tawo.

4. Higot na paggamit kan esalvar QR code nin huli sa mga report na igwa nin mga naka tagged sa esalvar na nagdudulag sa home quarantine asin nakakalaog sa mga establishemento asin nagrarason na mayo nin esalvar.