Latest

Salingoy Art Group member, grand prize winner sa painting contest


NAGA CITY (Bicol Standard) -- Dakulang onra asin paglaom an dinara sa rona kan Bicolandia ni Brian Oliver Ramos, 19 anyos, asin miembro kan Salingoy Art Group, kan manggana siya kan grand prize sa Montalban Painting Contest sa provincia kan Rizal.

Segun sa LGU Montalban, an premyo ni Ramos P100,000.00 para sa saiyang obra na may sukol na 4 x 8 pie.

An contest may temang "Bayan ng Alamat, Kasaysayan, Kultura, Likas-Yaman at Yamang -Tao para sa Likas-Kayang Kaunlaran."

Sabi ni Ramos sa Bicol Standard, minawot niyang ipaheling an mga magagayon na tanawon sa Montalban, na kun saen siya nagguikan.

"Gusto ko din ipahatid lalo na sa mga kabataang artists na maging kampante sila sa kanilang mga gawa, manalo matalo ang mahalaga ay nakasali at ibinigay nila ang kanilang makakaya," sabi pa.

Si Ramos nag-erok sa Montalban poon kan siya grade 1 hasta grade 10.

Dangan, magbalyo digdi sa Ciudad kan Naga tanganing magklase nin Senior High School (Animation and Illustration 12 AI-1) sa Camarines Sur National High School.

Sabi pa ni Ramos, ginibo niya an painting sa laog nin duwang bulan: sarong bulan para sa pag-isip kan konsepto asin saro man para sa mismong pagpinta.

"Siniguro ko talagang makukuha ko lahat ng detalye at mailagay ko sa obra ko ang mga mahalagang detalye," segun saiya.

Digdi sa Bicol, maging sa ibang parte kan Pilipinas, marikas nang nababantog si Ramos sa saiyang pagparticipar sa mga art exhibition, asin pagtukdo sa mga workshops.

Igwa siya nin YouTube channel kun sain nagpupublikar siya nin mga timelapse video kan saiyang mga drawing.

Idinagdag pa niya na gusto siyang makatao nin inspirasyon sa ibang mga tawo, lalo na sa jovenes, na paorogon asin iheras ninda an saindang mga talento.