Latest

Drug suspect sa Naga City, convicted; life imprisonment an sentencia kan RTC




NAGA CITY (Bicol Standard) -- Life imprisonment an ibinabang sentencia ki Ronnie Belleca, na kinasohan nin pagbalga kan Section 5, Article II kan Republic Act 9165, o an Dangerous Drugs Act of 2002.

An desisyon firmado ni RTC Judge Leo Intia kan Regional Trial Court Branch 27.

Binasahan kan desisyon kan jusgado si Belleca kasubagong odto sa sala kan nasambit na branch.

Afuera kan pagkapriso nin habang buhay, an condinado mabayad pa nin multang P500,000.

Sa saro pang caso, Criminal case No 2019-0222, an akusadong si Ronnie Belleca convicted pa guiraray asin na sentenciahan na mapriso nin poon 12ng taon asin sarong aldaw bilang minimum abot sa 14ng taon, bilang maximum, susog sa Indeteminate Sentence Law.

Mabayad pa siya nin multang P300,000.00

Mientrastanto, sa saro pa guiraray na caso, Criminal Case No 2019-0223, an pareyong akusado na si Ronnie Belleca, acquitted sa kaso, nin huli ta dai naprobaran beyond reasonable doubt.

Segun sa record kan caso, kan Marso 21, 2019, si Belleca, kinasohan nin pagbalga sa Section 5, Article II kan R.A 9165 kan pabakalan niya nin shabu an poseur buyer na may gabat na 4.719 grams, karibay kan kantidad na P15,000.

Naprobaran sa jusgado na "guilty beyond reasonable doubt" si Belleca.

Siring man, kan pareyong fecha, Marso 21, 2019, nakua ki Belleca an 12 plastic sachet nin shabu na may gabat na 19.615 grams.

An order firmado kan fecha 6 kan Octobre, 2020.

Pakalihis nin huru-halawig na panahon, ini an primero na naman na caso na pigbistahan sa RTC na convicted an akusado.

Si Prosecutor Virgilio Balane Jr., an fiscal na nagprosecute kan casong ini.