Latest

DepEd Bicol RD Sadsad: Magtarabangan kita para sa edukasyon


LEGAZPI CITY (Bicol Standard) -- "Magtarabangan po kita."

Ini an pakiolay ni DepEd Bicol Regional Director Gilbert Sadsad sa piggibong Virtual Press Conference kaiba an man laen laen na oficiales kan DepEd asin mga miembros kan media sa Bicol ngonian na hapon.

Sa tiripon na ginibo por medio kan Google Meet asin Facebook Live, pigtocar an status kan pagbukas kan klase sa rehiyon, orog na sa pag-implementar kan Basic Education Learning Continuity Program (BE-LCP).

Segun sa direktor, matrayumpo an pagbukas kan klase digdi nin huli sa tabang kan mga paratukdo asin an istriktong pag-otob kan mga health protocol.

Sinabi pa ni Sadsad na 90% kan mga estudyante sa Bicol an magamit kan modular distance learning approach.

Igwa man nin mga eskwelahan na magamit kan Online Distance Learning - Synchronous, Online Distance Learning - Asynchronous, pati na an pag-adal sa tabang kan radio, TV asin video lessons.

Sa pinakahuring datos, igwa nin 1,661,786 enrollees sa Bicol.

Kabali na digdi an sa public schools, private schools, SUCs/LUCs, asin ALS.

Ini mas hababa sa numero kan enrollees kan nakaaging school year, na nag-abot nin 1,843,540.

Pinasalamatan man kan DepEd an mga partner kan ahensya na nagtatabang sa mga programa arog kan Brigada Eskwela asin iba pa.

Inako kan mga oficiales na linalaoman an mga kadificilan ngonian na school year, 
alagad sa pagtarabangan, maootob an learning continuity apesar kan huma kan COVID-19.