Latest

Tabang sa mga negosyante sa pagtao nin 13th month pay, inaadalan kan gobierno


MANILA (Bicol Standard) -- Pig-aadalan kan gobierno nacional an posibilidad na makatao nin subsidiya sa mga saradit na negosyo na afectadong maray kan pandemya tanganing maipaabot sa mga empleyado an 13th month pay.

Segun ki Department of Labor and Employment (DOLE) Secretary Silvestre Bello III, kakaulayon niya si Finance Secretary Carlos Dominguez, kaiba si Trade and Industry Secretary Ramon Lopez tanganing kumbinsiron an secretarya kan DOF na matawan asistensya an mga negosyante.

Sa Presidential Decree 851, sabi ni Bello, kaipuhan itao kan employers an 13th month pay pag-abot o bago kan Disyembre 24.

Dai nin exception sa ley na ini, paliwanag ni Bello.

Alagan, sinabi nya man na sa Implementing Rules and Regulations, na ipinaluwas 4 na aldaw pakatapos pirmahan an ley, igwa nin exception sa mga negosyante o kumpaniya na nagsasapo nin grabeng pagtios o distress.

Sa presente, hinahalat pa na magkaigwa nin pakauruyon sa isyung ini, sabi kan Labor Secretary.