Latest

Mayor Legacion, nagpaluwas nin mga reglamento ngonian na Peñafrancia Fiesta


NAGA CITY (Bicol Standard) -- Nagpaluwas nin Memorandum Order ngonian na aldaw si Mayor Nelson Legacion manungod sa mga ipapaotob na reglamento ngonian na Peñafrancia Fiesta.

Segun sa alkalde, ini bilang pagsunod sa Joint Declaration kan Arquidiocesis kan Caceres asin kan Lokal na Govierno kan Naga para sa sarong Worldwide Stay Home Synchronized Divino Rostro and Peñafrancia Celebrations.
"Para maibitaran an dakulang pagtiripon na iyo an magigin rason sa pagkuriyat kan virus, an mga minasunod na reglamentos satuya pong ipapaatob puon saaga, Setyembre 11:
- Gabos na peregrino asin bakong esensyal na viaje sa Ciudad nin Naga ngonian na Setyembre ipagbabawal;
- Deboto na bakong residente kan Naga ineenkaminar na mag selebrar kan Fiesta sa saindang mga parokya;
-  An mga masimba dae dapat maglampas sa 50% seating capacity kan simbahan. Igwang direktiba sa PNP asin mga voluntario, sa koordinasayon kan parokya, na isasarado an simbahan kun mag-abot na sa 50% an yaon sa laog.
Mas papahigoton man niato an border control sa Naga, susog sa limitadong awtoridad na igwa kita, puon Setyembre 11 hasta Setyembre 21 asin maako lang nin LSIs asin mga mabisita sa Naga base sa mga minasunod na protocols:
KUN HALE SA LUWAS KAN BICOL
- An mga papuruling Naga dapat igwang health certificate, travel authority hale sa lugar kan saindang paghahalean asin letter of acceptance hale sa Ciudad nin Naga. 
KUN HALE SA LAOG KAN BICOL PERO LUWAS KAN CAMARINES SUR
- Dapat igwang health certificate asin travel authority hale sa lugar kan paghahalean.
KUN HALE SA LAOG KAN CAMARINES SUR
- Indibidwal na igwang emerhensya;
-  Kaipuhan magpaheling nin ID kun trabahante sa Ciudad nin Naga;
-  Essential goods, cargos, asin delivery vans kan mga kakanon, bolong asin iba pang mga mayor na kaipuhan sa aroaldaw na pagbuhay. 
Hinagad ni Legacion an kooperasyon kan mga tawo tanganing maging pasil an gabos ngonian na fiesta.