Latest

Ordinansa sa truck ban, ipinapasunod na sa Naga

File photo hale sa Naga Smiles to the World

NAGA CITY (Bicol Standard) -- Pigpoonan nang ipasunod kan gobierno lokal kan Ciudad nin Naga an City Ordinance na may numero 2019-055 na nagbabawal sa mga darakula asin haralabang truck na mag-agi sa mga tinampo na parateng nagkakaigwa nin traffic oro-aldaw.

An Public Safety Office nagsabi na 20 trucks kan sarong aldaw an saindang nadakop na nagbabalga kan ordinansa.

Segun sa reglamentong ini, an kagsadire kan truck may kastigo, kaya sinda tatawan nin citation ticket, bilang prueba kan saindang pagbalga kan ordinansa.

Kabale sa pigpapangalad na agihan kan mga trucks iyo an parte kan National Highway, sa parte kan Barangay del Rosario kanto kan Almeda, sa Concepcion Pequena; Concepcion Grande, sa may Rotonda, Diversion Road, sa parte kan Almeda, poon alas 6:00 nin aga hasta alas 8:00 nin
aga. 

Si Renne Gumba, an Chief asin Administrative Officer kan Public Safety Office, nagpatanid sa gabos na magiging stricto sinda sa implementasyon kan traffic ordinances, nin huli ta nagpapara dakula an
problema sa gurubot na traffico sa ciudad.

Maroromdoman na si Mayor Nelson Legacion asin an mga miembros kan Sangguniang Panlungsod an dai na pinopondohan nin reklamo kan mga tao huli sa mayo nin nahahaman na malinaw na plano tangani na matawan nin solusyon an problema sa traffic digdi sa Naga.