Latest

PhP1.2 M, nalalay kan parasalakat sa Naga City




NAGA CITY (Bicol Standard) -- Inadalan na maray kan parasalakat kun pano makalaog sa harong ni Fernan Gutierez, residente kan Brgy. Sta Cruz, asin mahabon gabos an mga saray na signature wristwatches, na nagkakantidad P1.1 million, tulong kwentas (P52,000), duwang hikaw (P12,000) asin sarong purcelas na (P12,000) an kantidad.

Base sa imbestigasyon, an incidente pwedeng nangyari sa pag-oltanan kan oras na alas 3:00 nin aga hasta alas 6:00 nin amay kasuodma.

Mayo nin nakareparo kan parahabon ta bwelong nag-agi sa mayor na gate kan harong, naglaog sa cuarto hale sa bukas na pwerta sa likod kan residencia derecho sa cuarto kan biktima.

Nagsabi an biktima na maski si camera na nakatakod sa laog kan cuarto niya, kinua pa kan nagsalakat saiya.

Mayo nin senyal na pigfuerza an paglaog sa harong ta mayo nin maski anong bagay na rinaot kan naghabon.

Si Gutierez, 32, negosyante, asin haloy nang nag eestar sa lugar na ini.

Sagkod sa panahon na sinsurat an baretang ini nagpapagados an imbestigasyon kan caso.

Igwa na nin mga pigdududahan na tawo na pwedeng may aram sa nangyari, alagad kaipohan nin dugang na evidencia para madakop an para salakat.