Latest

Suspechadong carnapper na taga Naga City, nadakop sa Libon, Albay


LIBON, Albay (Bicol Standard) -- Duwang caso criminal an aatubangon ni Rayan Valladolid y Barbadillo, residente kan Ciudad nin Naga, na ipigreklamo na imbuelto sa Carnapping asin pagbalga kan R.A. 9165 (Comprehensive Dangerous Drugs Act of 2002).

Si Valladolid pigreklamo sa pulis sa Naga City kan sarong aldaw nin huli ta sinasahotan sa paghabon nin mororsiklo.

Ipigsumbong sa Municipal Police Station kan banwaan na ini an suspechado na naheling sa Barangay San Isidro digdi.

Pinasadahan tulos kan mga awtoridad an lugar na kinakamugtakan ni Vallodolid, kaya inarestar siya, kasabay an pagkabawi kan hinabon na motorsiklo sa Barangay Marayag, sa banwaan na ini.

Nadugangan pa an saiyang caso kan madiscubre kan mga pulis na igwa siya nin darang duwang sachet nin shabu.

Yaon siya ngonian sa poder kan pulis mientras na pighahalat an formal na pagsangat nin caso contra saiya.