Latest

DOH, nagpatanid sa paggamit kan bulong na dexamethasone



MANILA (Bicol Standard)  -- Mantang naghahalat pa an Department of Health (DOH) sa proseso kan pagreview kan bulong na dexamethasone, nagpatanid an agencia kontra sa paggamit kan bulong sa helang na COVID-19.

Piglinaw ni DOH USec. Maria Rosario Vergeire an dexamethasone piggibo para sa mga pasyente na kritikal na an kondisyon, bilang parte kan saindang pig-aapod na supportive care.

Nagpatanid pa siya kontra sa pagbakal kan bulong para sa self-medication.

Segun sa DOH USEC, an pinakamarhay pa nanggad na proteksyon kontra sa virus, iyo an pirming paghanaw kan kamot, pagsulot nin face mask, pag-abo sa tamang paagi, asin social distancing.

Maroromdoman na ngunyan na semana, ipigbalangibog kan mga scientist hale sa United Kingdom an nadiskubre nindang pwedeng makatabang sa paghanap kan bulong sa COVID-19.

Segun sa mga pag-adal sa Oxford University, an baratong bulong na dexamethasone nakapababa kan bilang kan mga nagagadan sa COVID-19 nin hanggang sa 1/3.