Latest

Balik Probinsyam Bagong Pag-asa Program, sinuspendir


MANILA (Bicol Standard) -- Sinuspendir kan gobierno nasyunal an implementasyon kan Balik Probinsya, Bagong Pag-asa Program tanganing matawan nin prioridad an pagtransportar kan mga stranded na individual sa Metro Manila na makapuli sa provincia.

Ini an itinaong malinaw na instruction ni Presidente Rodrigo Duterte, sabi ni National Housing Authority (NHA) General Manager Marcelino Escalada Jr.

"Kaipohan enoton an mga kahimanwa na stranded sa Manila asin ini iyo an mga OFWs (Overseas Filipino Workers), an construction workers, mga turista asin estudiante," sabi ni Escalada sa briefing sa television.

Mapadagos an implementasyon kan Balik Probinsya program kun tapos na an problema kan mga stranded na tao asin natabangan na sinda.

Pwede na sa masunod na bulan, Hulyo, dikit na sana an mga stranded na pasahero na gustong magpuli sa saindang probinsya.

An programang ini na suportado ni Senator Bong Go, nakapukaw kan dakulang interest kan mga gustong magbwelta sa probinsya.

Si Presidente Rodrigo Duterte nagfirma kan nakaaging bulan nin executive order na nagbibilog kan Balik Probinsya, Bagong Pag-asa Council, na may obheto na mainaan an tao sa Metro Manila asin mapa-uswag an mga pwerang lugar.

Siring man, si Lanao del Sur Governor Mamintal Adiong Jr, nag-appelar kan pag suspendir kan programa, na binabasol niya sa paglangkaw kan numero kan naolakitan kan COVID-19 sa probinsya.