Latest

Shabu Queen kan Canaman, dakop; P850,000 na droga nakumpiscar


CANAMAN, CSur (Bicol Standard) Dipisil nang makaluwas sa carcel an 60 anyos na babae, na residente kan banwaan na ini na nadakop sa buy bust operation kan pulis.



Sabi sa report ni P/Capt Bienvenido O. Enciso, an suspechado iyo si Loida Navidad y Cleofe alyas “Shabu Queen," na taga Zone 7, Victoria Heights Subd. Brgy. San Agustin, Canaman Camarines Sur.

Nakua sa poder kan suspechado an 27ng sachet nin shabu, na may gabat na 114.032 gramos, asin mga droga paraphernalia.

An illegal na droga igwa nin street value na P850,000.00, sabi sa report.

Kakasohan siya nin pagbalga kan Sec. 5, 11 asin 12 kan RA 9165 (The Comprehensive Danegrous Drugs Act of 2002).

Mientras na ginigibo an imbestigasyon si Natividad yaon sa laog kan carcel kan Municipal Police Station kan banwaan na ini.

An buy-bust operation guinibo kan pinagsarong pwersa kan Canaman MPS, RDEU5, PIB CSPPO sa pangengenot ni PLTCOL JOSELITO ESICO, C, RDEU/RSOU asin sa koordinasyon man kan PDEA ROV.