Latest

Ina, ginadan an tulong (3) aki sa Camarines Norte




DAET, Camarines Norte (Bicol Standard) -- Nin huli sa makuring depression na sinasapo kan 28 anyos na ina, kaya nagibo niyang taragaon sagkod na magadan an tulo niyang aki, kasubagong alas 10:00 nin odto, sa Basud, Camarines Norte.

An mga biktima anas babae.

An matua 5 anyos an edad; ika duwa, labing sarong taon an edad asin an ika tulong biktima, 4 na bulan pa sanang omboy.

Segun sa report kan pulis, nangyari an krimen sa Barangay Pinagwarasan sa nasambit na banwaan.

Sa pahayag ni PCpt. Eva Guiruela, hepe Basud PNP naabotan ninda an mga biktimang nagkakarigos sa saindang dugo.

Igwa nin tama sa liog, tulak asin likod an mga aki.

May lugad man an ina sa saiyang tulak, huli ta pig probaran niyang gadanon an sadire, kan maheling na mayo nang buhay an mga aki.

An mga biktima anas idinalagan pa kuta sa Camarines Norte Provincial Hospital, alagad gabos sinda mayo na nin buhay.

An ina na dai na pinangaranan sa bareta an pigbubulong sa hospital.

Mientrastanto, an agom kan lalaki nasa trabaho bilang laborer.

Nagpahayag an agom na lalaki na mayo man sindang dakulang problema sa pamilya, afuera kan kun minsan nag-iiba an pagmate kan saiyang agom, huli sa pangaki.

Naaraman kan ama an nangyari kan magbwelta sa saindang harong para kuanon an saiyang gamit sa trabaho.