Latest

Gurang asin 'vulnerable' na tawo, an priority, kun igwa nang bakuna - Sec Roque


MANILA (BICOL STANDARD) -- An mga gurang asin "vulnerable" na tao an tatawan prioridad kun igwa nang bakuna sa COVID-19, sabi ni Presidential Spokesperson Harry Roque.

Sabi ni Roque, igwa nang plano an gobierno para sa pagbakuna kan mga tawo sa COVID -9.

Alagad, nin huli ta dakul an nagkakaipo kan bakuna, sabi ni Roque dai tulos matatapos an gabos, sa enot na pagluwas kaini.

Huli kan siring na sitwasyon, kaya kaipohan na adalan kun sisay an dapat tawan prioridad sa mga tawo na dapat bakunahan.

Idinagdag pa ni Roque na pwedeng pasanon kan gobierno an gastos sa pagbakal kan bakuna, orog si mga dai makaka agod kan gastos para digdi.

Bilang dating congressman na iyo an author kan Universal Healthcare Law, sabi ni Roque na an PhilHealth an pwedeng mag gastos para sa bakuna.

Enot kaini, si Presidente Rodrigo Duterte nagsabi na naglalaom siya na an bakuna sa COVID 19 pwedeng ma-aprovicharan sa Enero, sa masunod na taon, susug sa informasyon na hale sa American biotech firm na Moderna, na nagpasabot na positibo an resulta sa saindang primerong clinical tests.