Latest

Duwang (2) pulis kan Naga City, positibo sa COVID-19 rapid testing





NAGA CITY (Bicol Standard) -- An Naga City Police Office (NCPO) nagconfirmar na duwa kan saindang miembros an kabale sa limang nagpositibo sa ginibong Rapid testing kan ciudad.

Segun sa pahayag ni Police Senior Master Sergent Toby Bongon, spokesman kan NCPO, an duwang pulis na nag positibo kabale sa mga frontliners digdi.

Base sa informasyon, 381ng mga frontliners an nagparticipar sa Antibody testing kan LGU para sa COVID 19, asin lima (5) an nagluwas na positibo.

Mientrastanto, tulos kinuanan nin swab samples an duwang pulis asin hinahalat pa an resulta kan test sainda.

Ibinugtak ngona sinda sa quarantina, mantang hinahalat kun ano an masunod na gigibohon.

Si Dr. Butch Borja, an City Health Officer kan Naga City nagpahayag na dai nangangahulugan na como positibo sinda sa rapid test, positibo sinda sa coronavirus.

Ini an rason kun tano ta kaipohan magkaigwa nin confirmatory test sa sainda ngonian.