Latest

Catanduanes Gov Boboy Cua, mabalik sa pwesto sa Mayo 1



VIRAC, Catanduanes (Bicol Standard) -- Pakalihis nin sarong taon na suspension na pig imponir kan Ombudsman, si Gov  Joseph Cua makakabalik na sa pwesto bilang gobernador sa fecha 1 kan Mayo.

NIn huli kaini, nakatalaan na gibohon ngonian na aldaw, Abril 29, an turn over ceremony, paghale ki Acting Gov Shirley Abundo, pasiring ki Cua.

Segun sa report, poon pa kan Lunes, Abril 27, binakante na ni VG Abundo an opisina kan gobernador na saro taon man niyang pinamayohan.


Maging si Acting VG Lorenzo Templonuevo, an topnotcher kan Bokal kan Catanduanes an nagbwelta na man sa saiyang officina, sa junta provincial.

An suspension ki Cua abot sa aga, Abril 30.

Kinastigo siya nin sarong taon na suspension nin huli sa casong isinangat saiya sa Ombudsman ni Rey Mendez kan Septiembre, 2018.

An caso ki Cua, pagbalga sa Sec 3 (e) kan R.A. 3019, o an Anti Graft and Corrupt Practicec Act.
Afuera ki Cua, kabale sa caso iyo si dating alkalde Eulogio Rodriguez kan Bato, Catanduanes na kinastigo man nin 6 na bulan na suspension.

An reklamo ni Mendez contra ki Cua nag poon sa pagtugot kan gobernador na gamiton kan E.R. Construction na sadire kan agom ni Rodriguez an bakanteng lote kan LGU na mayo nin awtorisasyon guikan sa Sangguniang Panlalawigan.