Latest

2 NPA, gadan sa Monreal, Masbate kasubago



MASBATE CITY-- An pulis nagsabi na duwang miembros kan New People's Army (NPA) an nagadan kasubago, Jueves (Abril 30) kan magkaigwa nin encontrada sagkod an pulis saka an mga rebelde sa banwaan kan Monreal, Masbate.

Segun ki Maj. Maria Luisa Calubaquib, an para taram kan PNP Bicol, an mga pulis maserve kan mandamiento de aresto sa Barangay McArthur, alas 5:00 kasubagong aga, kan makasabatan an 15ng mga NPA.


Bakong malinaw sa report kan pulis kun sisay an plano nindang servehan kan mandamiento de aresto.

Dai sinabi sa bareta kun an mga pulis hinipaan sa dalan kan mga rebelde o pinugolan sindang i-serve an warrant of arrest, mientras na sinusurat an baretang ini.

Mientrastanto, pig confirmar ni Calubaquib na duwang mga rebelde an nagadan sa baradilan.

Afuera kan duwang bangkay kan NPA, nakakua pa an pulis nin duwang carbines asin sarong M-16 assault rifle sa pinangyarihan kan incidente.

Dai pa nabibisto an pangaran kan duwang nagadan na rebelde.