Sponsor

PDEA asset, kinasohan nin robbery extortion


Yebra
Photo by Bicol Standard


NAGA CITY—Pinangaladan na si Agent King Lucero, an hefe kan PDEA sa Camarines Sur na magpa interview sa media, dapit sa ipig dadaklag na isyu kontra saiya, nin huli sa imbestigasyon na ginigibo kan saindang opisina ngonian.

Si Lucero nagpasabot sa Bicol Standard na mahalat siya na matapos an imbestigasyon manongod sa suboot robbery-extortion na an sinasabing imbuelto siya asin an ibang mga tawohan kan Philippine Drug Enforcement Agency (PDEA).

Sa nagunong informasyon dapit sa robbery-extortion case na imbuelto an pangaran ni Lucero, si Ricelyn Yebra, alyas Joyce, na nagpabistong ahente kan PDEA,  bwelong nag estoryakan saiyang naaaraman asin partisipasyon sa nangyari.

Nag paliwanag si Yebra sa media kan kasohan siya sa Regional Trial Court (RTC) nin Robbery Extortion, na nangyari kan Domingo na odto, sa Zone 5, Brgy. San Felipe, digdi.

Sabi ni Yebra, dai siya nin pagkaaram kan robbery extortion na ini. Kun igwa suboot siya nin participasyon, nangyari ini ta ta nag tubod kan sugo ni  King Lucero, an pamayo kan PDEA sa Camarines Sur na ibahan sa BDO si Allanoding Tamora.

An duwang nasambit na pangaran iyo an biktima sa  robbery extortion.

"An sugo sako ni Lucero ibahan ko si Tamora sa BDO asin pakatapos ihatod ko sa bus terminal ta maoli sa Legazpi City", sabi ni Yebra.

Mientrastanto, nag pahayag pa si Yebra na antes  nangyari an sinasabing robbery holdup, bisto na niya asin kan PDEA si Salic Magoraon.

Kan Oktubre 23, 2019, igwa na sinda nin enot na transaction, ta nag test buy na sinda asin nakabakal sa sainda nin 100 gramos nin shabu.

Nangyari ini sa  SM, sa Sucat, Paranaque.

Robbery Extortion sa Naga City

"Nabigla ako asin an mga pagiriba kan maaraman na si Magoraon asin si Tamora yaon na sa Naga City. Kaya, dinumanan sinda kan grupo kan PDEA", sabi ni Yebra.

Kan Oktubre 27, alas 10:15 nin odto, nakipag helingan mananggad an mga taga PDEA asin si Yebra ki Magoraon asin Tamora sa San Felipe.

Duman na nangyari an sinasabing robbery extortion, ta suboot hinagadan kan mga  ahentes kan PDEA si Magoraon asin Tamora nin kantidad P3,000,000, tagani na dai sinda arestaron asin kasohan.

Afuera kan hinahagad na cuarta, kinua pa kan mga nagpabistong ahente kan PDEA si reloj asin wedding ring na sulot ni Tamora, kabale an gabos na laog na cuarta sa saiyang pitaka, sabi pa.

Maghapon kaiba kan PDEA si Tamora asin Magoraon kan Oktubre 27.

Poco mas o menos alas 6:00 nin bangui, paghale ninda sa Diversion Road, sa Mabulo paluwas sa Milaor, Camarines Sur saka pa sana sinda nagpasiring sa BDO sa SM City, sa Triangulo, digdi.

An pahayag  ni Ricelyn Yerba, mag atubangan sinda ni Lucero asin Magoranon sa laog kan itom na awto, na ibahan niya si Tamora paglaog sa SM ta makua nin cuarta sa BDO.

An dating P3 million na dati hinahagad sa duwa, nagi na sanang P900,000.00.

Dai na nangyari an pig hahalaw na pag withdraw nin cuarta na nabukingna an transaction, ta may nag sumbong na si Tamora sa pulis na biktima siya nin robbery extortion.

Pirang minutos sana, nagpadara nin dakul na pulis sa lugar asin dinakop si Yerba, na kan panahon na ito, nasikrapan ni Tomara na naghahalat pa saiya sa SM lobby.

Nin huli ta dai bisto an pangaran kan ibang PDEA agents na kabale sa casong ini, an solamteng nakasohan iyo si Yebra.

"Preparado ako na sabihon an gabos na katotohanan sa kasong ini," sabi pa ni Yebra.

Philhealth

Philhealth
Powered by Blogger.