Sponsor

Cuarta kan brgy, ipinusta sa bulang kan tesorero



IRIGA CITY (Bicol Standard)—Nadaog sa bulang an kantidad P269,000.00 na cuarta kan Brgy San Isidro, digdi, na para kuta sa honorarium kan mga oficial kan barangay asin empleado, kabale pa an fundo na gagastoson kan Coordinating Council meeting.

Ini an nadiscubre kan mga imbestigador, pakatapos na mag siyasat kun ano an nangyari kan dakulang kantidad, na pig withdraw ni Brgy Treasurer Gabriel Vargas y Toledanes kan Brgy. San Isidro.
Si Punong Barangay Gary Merino nagsabi na sinugo niya si Vargas na mag cobra nin cuarta sa Land Bank, para sa mga obligasyon kan saindang barangay.


Alagad, en vez na gastoson sa dapat gastosan, si Vargas nagdalagan sa bulangan, asin ipunusta an cuarta.

Kan madaog an cuarta, nag imbento nin estorya si Vargas, asin pinabugtak sa blotter kan pulis na siya naholdup, asin fuersahan na kinua saiya an cuarta.

Para tubodan an saiyang imbentong estorya, nagparapado pa nin matagas na bagay an tesorero sa saiyang payo, asin lalawgon, para maheling na hinoldup manangad siya.

Dai nakumbensir si Kapitan Merino, kaya siya nagpaimbestigar.

Nagluwas sa pag siyasat na nakipag kutsaba si Vargas ki Jimmy Padayao asin Mike Magistrado, para sinda magpatunay na totoo na hinoldup an tesorero.

Binayadan man sinda nin tig P5,000.00 an kada saro.

Alagad, dai nag asir an drama ta dakul an nag-sumbong na ipinadaog ni Vargas an cuarta sa bulang.
Powered by Blogger.