Nagtinda nin pekeng bulong, dakop sa entrapment sa Albay



NAGA CITY (Bicol Standard) -- Sarong 23 anyos na taga Brgy. Marupit, Camaligan, Camarines Sur na nabisto sa pangaran na Leo Noel Villamer y Galicia an sinangatan nin casong pagbalga kan R.A. 8203, o Special Law on Counterfeit Drugs.

Si Villamer dinakop kan mga tawohan kan Criminal Investigation and Detection Group (CIDG) sa entrapment operation na inapod Oplan Olea asin Oplan Mega Shopper sa Matacon, Polangui, Albay.
Ipig reklamo an suspechado kan Unilab, an pharmaceutical company.

Segun sa report, si Villamer dinakop kan pulis na dara-dara an 28ng kahon nin man laen-laen na claseng bulong, na carculadong nagkakantidad P12,000.

Ipig didistribuir niya ini sa mga sari-sari stores sa Albay.

An laog kan 28ng kahon iyo an minasunod: 2 kahon nin Neozep Forte; 2 kahon nin Tuseran Forte; 2 kahon nin Solmux; 10 kahon nin Alaxan FR, 10 kahon nin Bioflu asin 2 kahon nin Biogesic.
Kabale sa mga nakua sa suspechado an boodle money na sarong tunay na P1,000.00 asin 11ng ginurunting na papel.

Yaon si Villamer sa poder kan pulis sa Polangui, Albay kan sinusurat an baretang ini.
Powered by Blogger.