BREAKING | Chief Security Officer Musa kan Cam Sur, binadil sa Naga City


Musa


NAGA CITY (Bicol Standard) -- Binadil nin dai bistong lalaki an Chief Security Officer kan Provincial Capitol kan Camarines Sur, kasubagong poco mas o menos alas 6:30 nin bangui.

An biktima iyo si Jose Francisco Musa, poco mas o menos 50 anyos an edad.

Nangyari an incidente sa Block 23, lot 16 , Deca Homes Grandvale 1, San Felipe, Naga City.

Si Musa dating Jail Warden kan Tinangis Penal Farm, sa Pili, Camarines Sur.

Segun sa enot na resulta kan imbestigasyon, binadil an biktima mientras na mayo nin kuryente sa lugar, asin siya nakatukaw sa atubangan kan saindang residencia.

An mga testigo nakadangog nin tulong putok nin badil, hale sa dai nabistong suspechado, na an langkaw poco mas o menos 5'7 o 5'8, medyo mataba.

Naka sulot nin itom na jacket an suspechado asin maong na pantalon.

Naglakaw sana an suspechado pasiring sa lugar kan krimen asin padulag, pasiring sa dai pa naaaraman na klase nin vehiculo.

Idinalagan sa Mother Senton Hospital an biktima.

Hinahalat pa an imbestigasyon na ginigibo kan SOCO, sa lugar kan krimen.

UPDATE: Pigconfirmar na kan informante kan Bicol Standard na binawian na an biktima nin buhay sa ospital.
Powered by Blogger.