Comelec Naga, CSur: Rehistrasyon kan botante, malaymay


NAGA CITY (Bicol Standard) -- Malaymay na entero an registration kan mga botante sa naka aging pirang aldaw sa Commission on Elections, apisar kan bukas an saindang opisina, Lunes hasta Sabado, alas 8:00 hasta alas 5:00 nin hapon.

Ini an obserbasyon kan election officials sa Ciudad nin Naga asin sa Provincia nin Camarines Sur.
Si Atty. Maico Julia Jr., an Election officer kan Naga City asin si Atty. Noriel Badiola, an Provincial Election Officer kan Camarines Sur, pareyong nag papaguiromdom sa mga qualificadong botente na mag parehistro na, ta abot sanang katapusan kan Septiembre bukas an rehistrasyon.

Siring man, pinaguiromdom kan election officials na si mga dai nagboto nin duwang surunod na election, kaipohan mag pa re-activate kan saindang pangaran bilang botante, ta de-activated na an saindang mga rehistrasyon.

Sa obserbasyon kan mga election officials, malaymay an registration kan mga botante huli ta pig annunciar ni Pres Rodrigo Duterte na hinahagad niya sa congresso na i-oktaba an SK asin Barangay Elections na nakatalaan sa masunod na taon.

Alagad, sa parte kan Comelec, sagkod na mayo pa nin ley na nag ooctaba kan election, padagos an saindang trabaho na mag rehistro nin mga botante.
Powered by Blogger.