82 anyos na gurang, inagawan purcelas sa Naga City



NAGA CITY (Bicol Standard) -- Sarong 82 anyos na gurang na babae an nagreklamo sa pulis pakatapos agawon an saiyang sulot na purcelas na kantidad P30,000, kan siya maglunad sa tricycle sa tungod kan People's Mall, digdi.

An biktima iyo si Francia San Buenaventura nagsumbong sa pulis na poco mas o menos alas 7:25 nin aga, nabigla siya kan mag rani an sarong lalaki na dai niya bisto asin fuersahan na agawon an sulot niyang purcelas.

Marikas na nagdalagan padulag sa direksyon kan ground floor kan Naga City People's Mall an dai nabistong lalaki na dagos nang nawara sa pagheling kan biktima.

Mientrastanto, an biktima ipina blotter an nangyari saiya, kaya an pulis nag gibo nin paagui tangani na mahanap an snatcher.

Sabi kan imbestigador kan pulis, pig review ninda tulos an CCTV footage kan Naga City People's Mall asin malinaw na nabisto an parahabon.

Pinangaranan kan pulis na an nag agaw kan purcelas kan gurang iyo si Rey Bernal y Martillano, nasa mayor de edad, residente kan Zone 5, Brgy. Igualdad.

Hastang sinusurat an baretang ini dai pa nadudukayan kan pulis an suspechado, na padagos hinahanap ngonian.

Afuera kan incidenteng ini, igwa pang mga naenot na reklamong pinaabot sa pulis dapit sa operasyon kan mga paradukop asin para salisi sa parte kan Naga City People's Mall.

An siring na clase nin krimen parateng nangyayari digdi kun madali nang mag abot an Penafrancia Fiesta na dakul na asin siribot an mga tawo sa pagsaod.

Trending

Powered by Blogger.