Misis ginadan an agom sa selos



NAGA CITY (Bicol Standard) - Tagob nin pagbasol asin pagpakumbaba sa mga miembros kan saiyang familya si Andres Marcaida y Ananita, an suspechado na nag saksak asin nag gadan sa saiyang agom na taga Brgy. Sua, Canaman, Camarines Sur.

Si Marcaida pugol na ngonian kan mga awtoridad.

Kakasohan siya nin Parricide huli sa pag gadan sa saiyang agom na si Mary France Marcaida y Marqueses.

An krimen nangyari sa laog kan saindang residencia sa sinambit na barangay.

Base sa imbestigasyon, an suspechado kinubabawan makuring pag imon sa saiyang agom, huli sa mga nasagap na huring huding asin suspecha na igwa siya nin ibang karelasyon.

Sabi pa sa pag siyasat, an biktima tulong taon nag trabaho sa ibang nasyon asin bago pa sanang magpuli sa saindang barangay.

Nangyari an krimen pasado alas 10:45 nin aga, kasuodma (July 29).

Antes na saksakon kan suspechado an saiyang agom nagkaigwa ngona sinda nin mainit na iwal asin riribayan nin mamakulog na mga tataramon.

Pakatapos na saksakon kan suspechado an saiyang esposa, nagdulag ngona siya.

Mientrastanto, an biktima idinalagan pasiring sa hospital, pero pig declarar na mayo na nin buhay sa hospital.

Pirang oras sana an nakalihis, nadakop man tulos si Marcaida kan mga awtoridad.

Yaon siya ngonian sa laog kan carcel, nagkakalat kan caso na isasangat sa opisina kan procurador.

Trending

Powered by Blogger.