Barryman's Coffee and Tea

Barryman's Coffee and Tea

Alert Level 2, nakabandera sa Bulkan Mayon


File photo

LEGAZPI CITY (Bicol Standard)--Pakalihis nin pirang semanang pagiging tuninong kan Bulkan Mayon, an Phivolcs nag sabi kasuodma na igwa na manan sindang nairihistrong aktibidad, sa nakalihis na 24 oras.

Makusog an pagtubod kan nakadistinong volcanologist digdi na igwa nin nangyayaring aktibidad sa irarom asin paralibot kan bulkan, an kabale sa prueba iyo an pagiging "hubag" o gatok kan abaga kaini.

Segun sa Phivolcs pig bandera na ninda an Alert Level 2 sa Mayon Volcano, na an gustong sabihon pwedeng mag tupga ini nin abo ano man na oras.

Pinatanidan liwat kan Phivolcs an mga tawong nag eestar sa paralibot kan bulkan, orog na si mga nasa laog kan permanent danger zone abot sa pitong kilometros na extended danger zone nin huli ta dakula an peligro na pwede nindang sapoon, kun madagos na pagbuga nin abo an aktibong bulkan.

Mientrastanto, prohibido sa gabos na tawo an paglaog sa 6 na kilometros na permanent danger zone.
Sinambit kan Phivolcs an mga peligrosong lugar, arog kan Brgy. Anoling, sa banwaan kan Camalig abot sa Brgy Sta. Misericordia, sa banwaan kan Sto. Domingo, Albay.

An peligro mas orog sa mga lugar na pwedeng agihan kan nag rarasay na gapo asin lahar na hale sa abaga kan bulkan, kada magbulos an makusog na uran.

Philhealth

Philhealth

Ako Bicol

Ako Bicol

Trending

Powered by Blogger.