Nagpabistong aki nin heneral, arestado huli sa Comelec Gun ban



PILI, Camarines Sur (Bicol Standard) --Sinangatan na nin caso an sarong lalaking nagpabistong aki nin sarong Heneral na taga Marawi City, pakatapos magparapaputok nin badil, asin mag eskandalo sa lugar.An suspechado iyo si Ricnard Danao y Ricafrente, 35 anyos, mag agom, laborer asin nag eestar sa brgy. San New San Roque, digdi.

Segun sa record kan pulis, alas 8:30 nin bangui kan mangyari an incidente sa Brgy. San Isidro, mientras na nag iirinoman na mag- aramigo na sinda Frankling Bearis y Salona, 62 anyos, Dominador Del Rosario Jr., Bulalacao, 39 anyos, Roque Galvan, Rafael Bulalacao, Dennis Bulalacao asin Ricky de Villa.

Biglang nag abot an suspechadong si Danao, asin naghahapot kun bisto kan mga nag iirinoman an sarong may pangaran na Dela Justa.

Nag simbag an nag iirinoman na mag bararkada na dai ninda bisto, asin sa dai maaraman na rason, basta na sanang nag bunot nin badil an suspechado dangan nagpaputok nin duwang beses.
Nin huli sa nangyari, kanya-kanyang durolagan an mga nag iirinoman na lalaki, alagad nawalat si Bearis.

Pinirit kan suspect si Bearis na inomon si natatadang laog kan apat na boteng beer sa lamesa asin nag-aablada an suspect na aki siya kan heneral.

Dai napirit si Bearis na inomon an laog kan 4 na boteng beer, kaya liwat nagpaputok an suspechado nin duwang beses. Pakatapos, nagsangkay na ini sa darang motorsiklo.

Nag gibo nin hot pursuit operation an mga pulis pakatapos na i-sumbong an incidente sa hepatura kan PNP sa Pili.

Nasusug kan mga awtoridad an suspechado sa saiyang pig eestaran na harong kaya derecho siyang inarestar.

May nakua sa suspect nin calibre .45 na badil na may carga nin mga bala.

Nin huli ta mayo siyang ikinapaheling na licensia, kinasohan siya nin pagbalga sa RA 10591 (Illegal Possession of Firearms and Ammunition) asin pagbalga kan Omnibus Election Code nin huli na effectibo pa hasta ngonian an Comelec gun ban.

Trending

Powered by Blogger.