Pulis binadil, gadan sa Sorsogon



LEGAZPI CITY- Sarong pulis an binadil, gadan ngonian na aga (Lunes, Marso 18) kan dai nabistong lalaki sa Pilar, Sorsogon, sabi sa report kan pulis.

An biktima iyo si Senior Police Officer 3 June Razo, 52, miembro kan Pilar MPS, residente kan Brgy. Binanuahan, Pilar, Sorsogon.

Hinipaan siya sa dalan kan tulong lalaki na pig tutubodan mga miembro kan New People's Army (NPA), pakatapos na ihatod niya an saiyang agom sa Calongay Elementary School.

Pasiring kuta si Razo sa police station para mag atendir kan Flag raising ceremony kan bugtakan nin kawayan an agihan na tinampo na iyo an rason sa pagluway-luway niya nin dalagan kan pig mamanehong motorsiklo, pag tungod sa lugar na ini sa highway.

An mga suspechado nagpahipli sa poon nin acacia, kaya bwelong binakbakan an biktima nin surunod na putok nin badil, hale sa armalite.

Nagsapo nin 4 na tama nin bala sa saiyang lawas si Razo, na iyo an saiyang ikinagadan.

Mientrastanto, kinua kan mga para gadan an service firearm kan pulis na sarong Beretta 9mm pistol, na may serialnumber N55274Z asin 3ng magazines. 

Pakatapos kan incidente an mga suspechado naglakaw sana padulag, sa direksyon pasiring sa Brgy Lumbang, Pilar, Sorsogon.

May nakuang 4 na capsula nin bala an mga imbestigador hale sa M16 asin 3ng ilog kan bala hale sa Cal .45.

Trending

Powered by Blogger.