Sponsor

Lalaking armado nin balisong, naka saksak nin 2 tawo; nabadil kan pulis, gadan



NAGA CITY- Binawian nin buhay an dai pa bistong lalaki kan siya badilon kan pulis na nagresponde sa krimen na nangyari sa Katlynes Food House, sa Biak na Bato St., Tabuco, digdi.

Segun sa spot report kan pulis, ala 1:00 nin hapon, ngonian na aldaw, si Nenita Bien, 34, may agom, taga Kamuning, Calabanga, Camarines Sur, asin si PCI Norlito Escota y De Lima, 45, taga Concepcion Grande, sinaksak na kan lalaki na garong naghuhuramentado, gamit an armas na balisong.

Base sa imbestigasyon, mantang ai Bien nasa laog kan saiyang pig tatrabahohan bilang parahugas nin plato, naglaog an dai bistong lalaki na may dara nin balisong.

Mayo nin pinag ponan bastang sinaksak na sana nin pirang beses si Bien sa itaas na parte kan saiyang lawas.

Mientrastanto, mantang an mga pulis nag coconducir nin hot pursuit operation, naabotan ninda an lalaking nagpapasaway, nag aangot asin nag-wawasiwas kan saiyang armas na balisong.

Si PCI Escota na nag lalakaw man sa pareyong lugar sa atubangan kan establisimientong Your Home, sa Brgy. Triangulo, asin nag probar na magsaway kan lalaking may armas.

En vez na mag surrender sa mga awtoridad, sinaksak pa lugod si PCI Escota, na tinamaan sa itaas na parte kan saiyang lawas.

Dai pa nasaway kan mga pulis, nabirikan kan armadong lalaki si PO1 Flores, na gusto pa kutang saksakon, kaya binadil lugod siya kan awtoridad.

Nin huli kan tama nin bala, binawian nin buhay an lalaking pasaway.

Idinalagan pa kuta sa Bicol Medical Center (BMC) an lalaki, alagad an sabi, mayo na siya nin buhay.

Si PCI Escota asin si Bien pig bubulong ngonian sa hospital.

Nagpapadagos pa an imbestigasyon kan kasong ini.
Powered by Blogger.