Sponsor

Municipal Councilor Texon kan Lagonoy, ikinonkon sa carcel



LAGONOY, Camarines Sur (Bicol Standard) -- Pig lalaoman na mapupurnada na an planong maka-reelection bilang consejal kan banwaan ni si Randy Texon y Aserdano, pakatapos na siya arestaron kan mga ahentes kan gobierno, huli sa pagka-imbuelto sa illegal na droga.

Si Texon dinakop kan mga awtoridad sa saiyang harong sa Brgy. San Isidro Norte, digdi.

Binitbit pasiring sa opisina kan PNP Lagonoy si Texon, pakatapos na i-implementar an search warrant sa saiyang residencia, na kun saen nakuanan siya nin 19ng pakete na may laog nin pigtutubodan shabu.

Base sa pahayag ni PSI Alex T. Sumayao, OIC Chief of Police kan Lagonoy MPS, si Texon an pig coconsiderar na No. 1 sa Municipal drug watch list asin consideradong high value target.

Si Texon an pigtutukdo na pig kukuanan nin shabu kan ibang nag didistribuir kan illegal na droga digdi asin sa pagtaraid na mga banwaan.

Idinagdag sa report na haloy nang pig susubaybayan si Texon kan mga ahentes kan gobierno, nin huli sa saiyang lantadan na participasyon sa pagtinda nin droga.

Alagad, maulyas na maray an suspechado, kaya pig marhay kan mga awtoridad na mag apply nin search warrant sa saiyang residencia, na digdi nakua an mga illegal na droga.

Maatubang si Texon nin kaso sa pagbalga kan RA 9165 o Comprehensive Dangerous Drugs Act of 2002.

Antes siyang inaresto, aktibo siya sa pagkampanya bilang re-electionistang consejal sa banwan na ini, sa nagraraning election sa Mayo 13.

Philhealth

Philhealth
Powered by Blogger.