Bokal Noble guilty sa casong inaatubang sa Sandiganbayan



NAGA CITY—Inako ni Board Member Emmanuel Haber Noble na guilty siya o may sala sa dai pag liquidate kan mga gastos sa travel asin cash advances na nagtotao nin kantidad P169,101.50 kan 2016.

Ini an declarasyon ni Noble sa Sandiganbayan, na iyo an nagbista kan casong isinangat contra saiya.

Base sa desisyon kan Sandiganbayan na may fecha Enero 24, an 7th Division nagpaluwas nin desisyon na "convicted si Noble' sa paglabas sa Sec 89 kan PD 1445 asin dai mag comple kan accountable officer na mag render cuenta kan saiyang kinuang cuarta sa gobierno.

Kinastigo siya nin multang kantidad P3,000, asin may subsidiary imprisonment kun mayo siyang ikabayad kan sinambit na kantidad.

Si Noble enot na kinasohan sa Sandiganbayan nin Malversation of public funds.

Nag recibe siya nin total na cash advances na kantidad P444,477.50, kan siya board member kan Camarines Sur. Alagad, dai siya nag account kan kantidad P169,101.50, apisar kan pirang beses siyang pinag avisohan na bayadan an sinambit na kantidad.

Durante kan hearing kan Nov 16, 2018, an kampo ni Noble nag informar sa Sandiganbayan na igwa siya nin Certification hale sa Commission on Audit na binayadan na niya an "unliquidated cash advances kan Sept 2, 2014 pa.

Itinakod niya an separadong certification hale sa Office of the Provincial Accountant kan Camarines Sur na ibinalik na niya an kantidad P444,477.50 sa bale duwang pago.

Naghagad si Noble na magkaigwa nin plea bargaining agreement sa prosecution, na inaprobaran man ni Ombudsman Samuel Martires, karibay kan saiyang pag ako kan saiyang kasala asin kahagadan na kastigohon sa mas hababa na kaso.

An Sandiganbayan na naintindihan na entero nin Noble an consequencia kan saiyang re-arraignment, na kun saen sinasabi na an saiyang pakimaherak dapat apreciaron afabor saiya nin huli ta ini nangyari antes na mag presentar nin evidencia an prosecution.

Kontento an jusgado na naintindihan na maray kan akusado an clase asin consequencia kan saiyang pakimaherak. Huli kaini nag sugo an Sandiganbayan na ribayan an plea ni Noble sa sa mas hababa na crimen, na iyo an ibugtak sa record kan mga caso na sindang inaatubang.

Si Associate Justice Ma. Theresa Dolores Gomez- Estoesta iyo an nagsurat kan desisyon asin nag oyon sinda Asscociate Justices Zaldy Trespeces asin Georgina Hidalgo.

Trending

Powered by Blogger.