Thursday, May 17, 2018

Negosyante, sa Masbate, hinipaan sa dalan, binadil




MASBATE CITY (BICOL STANDARD) Binadil asin may tama nin bala an negocianteng si Ely Bustamante y Lander, 41 anyos, residente kan Barangay Umabay Exterior, Mobo, Masbate.

An krimen nangyari sa National Road, sa Barangay Kinamaligan digdi, alas 10:57 nin aga (Mayo 16).

An duwang suspechado dai pa nadadakop kan mga awtoridad hasta ngonian.

Naluluwas sa report kan pulis na an biktima papuli sa saindang harong, nakalunad sa kolor abohon na Toyota Altis, hale sa Barangay Sta. Maria, Mobo, Masbate.

Hinipaan siya kan duwang suspchedo asin binadil nin nagkapirang beses, mantang an mga suspechado naka lunad sa motorsiklo na mayo nin plaka.

Maswerteng an tama kan bala sa biktima sa saiyang walang takyag sana, kaya nakalibre sa kagadanan.

Dinara si Bustamante sa Masbate Doctor’s Hospital para ipabulong.

Mientrastanto, nakua sa pinangyarihan kan krimen an 16 capsula hale sa calibre .45 na badil

Nag iimbestigar pa hasta ngonian an mga pulis para aramon kun ano an motibo kan mga criminal.
Share:

Solterong naki bayle sa Calabanga, binadil, gadan



CALABANGA, CSur (BICOL STANDARD) An makuring tama nin bala sa lawas ni Marvin Baldemoro y Legardo, na taga Barangay Burabod an saiyang ikina gadan, mantang nasa kaorogmahan sa Barangay Camuning digdi.

An mga imbestigador nagsabi na an biktima yaon sa baylehan kan diya dinukol nin lalaki na may armas na badil, dangan pinaputokan.

An incidente nangyari, mag omagahon kan Mayo 16, sa sarong benefit dance sa nasambit na lugar.

Nin huli sa tama nin bala, idinalagan pa si Baldemoro sa Bicol Medical Center (BMC) sa Ciudad nin Naga para ipabulong.

Alagad, dai na siya naka aguanta asin pig declarar kan doctor na dead on arrival.

Dai aram kun ano an motibo kan pag gadan saiya.

An sabi, pig probaran pa siyang kaolayon kan mga nag agap sa saiya, para aramon kun sisay an nagbadil, pero dai na kayang magtaram kan biktima.

Nagpapadagos an imbestigasyon kan bagay na ini para maaraman an kag gibo kan krimen.
Share:

Nag bilar sa gadan, nakuang gadan



VINZONS, CNorte (BICOLSTANDARD) Mayo talaga nin posibilidad na mabuhay an sarong lalaki na nakuang malipot nang bangkay nin huli sa tama nin bala sa saiyang daghan sa Manlucungan sa banwaan na ini.

An pangaran kan gadan iyo si Celencio Jerico, 55 anyos an edad, lagartong binadil sa daghan kan dai pa nabibisto na criminal.

Segun sa report nan aka abot sa hepatura kan pulis, ultimong naheling na buhay an biktima na pasiring sa sarong gadan, para siya magbilar.

Sa nasambit na bilaran, siya nakipag inoman pa sa nagkapirang kahampang na mga lalaki sa lugar.

Si Arnel Moya, na residente kan lugar harane sa pinangyarihan kan incidente an nagsabi sa pulis na nakadangog siya nin makusog na putok nin badil, na pwedeng iyo si ikinagadan kan biktima.

Nadiscubre an bangkay ni Jerico, kan magliwanag na an aldaw, na nagkakarigos nin dugo nin huli sa bala na nagtadom sa saiyang daghan.

An pulis nag sugo na magkaiwa nin autopsy sa bangkaw kan biktima.

Hastang sinusurat an baretang ini mayo pa nin informasyon kun sisay an responsabble sa pag gadan kan biktima.
Share:

Sekyu sa Libmanan, nakuryente, gadan


LIBMANAN, CSur (BICOLSTANDARD) Maitom na an lawas asin mayo nan in buhay an security guard na nakadistino sa sarong eskwelahan sa banwaan na ini.

Naaraman kan mga nag imbistar kan nakuang bangkay na an biktima iyo si Roman Morandarte III, 40 anyos, na nag tatrabaho bilang guardia sa Ezer Christian School, Inc. digdi.

Sabi sa report na ipinaabot sa pulis, an nakadiscubre kan bangkay ni Morandarte iyo an administrador kan eskwelahan na si Genel Delfin, kan mag report siya sa trabaho.

An sabi, an gadan, afuera kan pag guardia, nagpintura kan atop kan escuelahan.

May senyal na nakadoot an saiyang lawas sa linya kan kuryente na nakaladlad harane sa atop kan edificio, asin iyo an naging mitsa kan saiyang kagadanan.
Share:

3ng lalaki irido kan magburulagtig an truck na piglunadan



CARAMOAN, CSur (BICOL STANDARD) -  Tulong lalaki an irido kan makasabat nin aksidente an truck na saindang pig lunadan na pasiring kuta sa Caramoan, Camarines Sur.

An driver kan truck iyo si Aldwin Rodavia, 27, nagsapo nin mga rungas sa lawas, mantang an duwang pahinante, na iyo sinda Gerry Gorobat, 38 anyos, asin Ryan Sanchez, 31 anyos, pareyo irido, nin huli sa aksidente.

Sabi kan mga imbestigador, an truck naburolagting kan mawaran nin control kan manibela an driver na si Rodavia mantang nagdadalagan sa tinampo sa Barangay Antolon, sa banwaan na ini.

Segun sa deklarasyon kan driver, mayo dai na niya nabawi an manibela kaya dagos nang nagbaliktad an truck

An truck hale sa Ciudad nin Naga pasiring sa Caramoan.

May karga ini nin limang barel na pano nin crudo; limang kabaong asin 373 na sari saring klase nin softdrinks, na enterong naula sa tinampo kan mangyari an aksidente.

Afuera kan mga rungas asin pasa sa man laen laen na parte kan lawas kan mga nakalunad sa truck, sabi sa report mayo man nin napeligrohan na iba pa.

Pig iimbestigaran pa kan mga awtoridad kun marikas an padalagan kan driver kan saiyang pig mamanehong vehiculo, ta sa lugar na pinangyarihan, parate nangyayari an disgracia sa tinampo.
Share:

Monday, May 14, 2018

PIODURAN, Albay: “Shooting” incident, pig iimbestigaran



PIODURAN, Albay 5/14/18(BICOLSTANDARD) –Nag iimbestigar pa an mga awtoridad sa incidente nin pambabadil sa Brgy. Cuyaoyao, digdi kasubagong poco mas o menos alas 7:20 nin aga (Mayo 14).

Segun sa pulis si Nilo Morco y Soria, 55 anyos, Punong barangay sa Cuyaoyao, Pioduran, Albay dinulok an sarong nag ngangaran na Ambo asin an saiyang kairiba.

Kan hinapot ni Kap Morco y Soria kun “nga sisay kan Ambo”, nagsimbag si Ambo na “nga tao ko kan”.

Sa siring na pangyayari, sinabihan kan Kapitan si Ambo na dai maghiro.

Alagad an saro nindang kaibahan na may pangaran “Madela” na taga Barangay Nablang Bulod, Pioduran, Albay an nahelingan nin sukbit na badil sa saiyang habayan.

Tinakma suboot ni Kap. Morco an badil sa habayan ni Madela, pero sinuntok siya sa saiyang pandok.

Kan narisa kan bikrima na pig gagaw-daw na naman ni Madela an saro pang badil sa likod kan saiyang lawas, binadil na ini kan biktima para defensahan suboot an saiyang sadire.

An ginamit na badil yaon ngonian sa poder kan mga awtoridad.

Mientrastanto, si Kap Morco asin an iba pang mga imbuelto digdi an yaon ngonian sa hepatura kan pulis para imbestigaran.

Nagpahayag an mga awtoridad na magibo sinda nin hararom na pag siyasat kan incidenteng ini sa nasambit na banwaan.
Share:

LUPI: Babae tinamaan nin bala mientras nagtuturog


LUPI, CSur –5/14/18 (BICOLSTANDARD) –Sarong babae na residente kan Brgy Bel Cruz an pig bubolong ngonian sa Bicol Medical Center (BMC) pakatapos na tamaan siya nin “stray bullet” sa saiyang walang takyag.

An incidente nangyari kasubangui (Mary 13), poco mas o menos alas 11:00 nin bangui, mantang an biktima nagtuturog na sa laog kan saindang residencia.

An biktima iyo si Agnes Bonita y Lolo, 33, may agom, residente kan Bel Cruz, digdi.

Sabi kan imbestigador ngonian sanang aga naka abot sa sainda an informasyon sa nangyaring ini.

Enot na idinalagan sa Ragay District Hospital an biktima.

Alagad, ibinalyo sa Bicol Medical Center sa Naga City, tangani na matawan siya mabulong.

Hastang sinusurat an baretang ini dai maaraman kun sisay an nagpaputok nin badi na nakadisgracia ki Bonita.

Dai man aram kan biktima kun anong claseng bala nin badil an nagtaka sa saiya.
Share:

Brgy Kgd sa Masbate, binadil kan Kapitan sa Placer



MASBATE 5/13/18 (BICOL STANDARD) - Maswerteng nakalibre sa kagadanan an sarong barangay kagawad asin sarong para rigaton nin sira na sinurongan sa saindang harong kan mga armadong suspechado.

An incidente nangyari sa barangay Katipunan, Placer, Masbate, kasubangui.

Base sa despacho kan pulis si Barangay Kgd. Alfon Pahilino y Metran, 36 anyos, asin Donald Pahilino y Metran, 41 anyos, tinuyo sa saindang residencia kan suspechadong si Francisco Jesus Racaza y Conde, Punong Barangay kan Brgy. Katipunan, Placer, dangan binadil sinda.

Afuera ki Racaza, may duwa pa siyang kaiba na dai nabisto an mga pangaran sa pag surong sa harong kan mga victima.

An sabi, an mga victima yaon sa luwas kan saindang harong kan mag abot an mga suspechado na nakalunad sa puti na Mitsubishi L300, na may plate No. AXA 2572.

Igwa man sindang sukbit na badil na calibre .45 asin M16 Armalite rifle.

Pag-baba sana sana ni Racaza sa awto na piglunadan pinutokan na tulos an mga biktima na maswerte na dai tinaam, kaya naka kutipas padulag.

Nagpadara tulos nin mga tawohan an RSOTG katabang an pulis kan Placer, na iyo an nag arestar ki Francisco Racaza.

Nakua sa lugar na pinangyarihan kan krimen an 4 na baseyo nin bale kan calibre .45, asin 7 na capsula para sa Armalite rifle.

Segun sa mga imbestigador, an causa kan krimen iyo an matindi na ralaban sa politika kan mga nasambit na tawo.

Nagpapadagos pa an pag siyasat kan incidenteng ini.
Share:

Sunday, May 13, 2018

RAGAY: 2 army nagadan sa encounter



NAGA CITY – 5/13/18 (BICOL STANDARD) Duwang soldados an nagadan sa halipot na encontrada sa mga suspechadong miembros kan New People’s Army sa banwaan kan Ragay, Camarines Sur ngonian (Domingo), sabi sa report kan pulis.

Segun sa despacho na hale ki Col. Ferozaldo Paul. T. Regencia, an parapahayag kan 9th Infantry Division kan Philippine Army, duwang sepadong encontrada an nangyari sa Ragay. An enot na baradilan nangyari poco mas o menos alas 8:30 nin aga, sa Barangay Salvacion asin nasundan tulos kan saro pang baradilan sa Barangay Patalunan, alas 10:20 kasubagong aga.

An duwang soldados nagadan sa baradilan sa Salvacion, sabi ni Regencia.

Mientrastanto, nakiolay an mga awtoridad na ipa-isi ngona sa familya kan mga nagadan, antes na ibuyagyag an saindang completong pangaran.

Mientrastanto, an Ragay yaon sa Category 2 sa election hotspots sa election lokal sa aga.

An mga barangay na considerado sa lindong kan Category 2 iyo itong mga lugar na mainit an riribalan kan mga kantidado; igwa nin estorya nin mga kariribohan na may koneksyon sa election, o igwa nin confirmadong presensya nin mga armadong grupo.

Idinagdag pa sa report na ipinaisi sa mga awtoridad na sa lugang na pinangyarihan kan encounter, igwa nin mga ibinugtak na kandidato sa barangay asin Sangguniang Kabataan election an mga NPA.
Share:

Featured Post

San Miguel Bay Writers Workshop now open to applicants

The Central Bicol State University of Agriculture- Calabanga College of Education in cooperation with The Writers Project and Parasu...