Utang kan DPWH Bicol sa mga contratista, nagpapara dakula pa



LEGAZPI CITY (Bicol Standard) -- Dakula nang problema an inaatubang ngonian kan Department of Public Works and Highways (DPWH) sa Bicol nin huli sa dakula nang kantidad nin cuarta an dai nababayadan sa saindang mga contratista.

Segun sa pahayag kan official kan DPWH sa region, na habo magpasambit kan pangaran, nag aagrangay na an mga contratista nin huli sa matatapos na an taon, dai nakaka collecta an mga contratista, na mayo sinda nin cash.

Mismong an officina regional kan DPWH an nagkukulog na an payo sa kasisimbag sa kapotan kan mga contratista, na nag ngangayo-ngayo na magkaigwa nin collection, ta dakul na an saindang mga babayaran, kabale an mga benefisyon kan mga empleado na dapat maitao antes magtaon an taon.

Base sa pahayag kan informante, dai makulang sa limang bilyon na pesos an dapat bayaran sa mga contratista hasta sa katapusan kan Nobyembre, nin huli sa tarapos nang patrabaho, alagad mayo nin cuarta an opisina.

Sabi kan budget officer kan sarong distrito sa Camarines Sur, nakatambak na sa saindang officina an mga papeles kan mga contratista, poon pa kan naka-aging tulong bulan, alagad maromarom an paglaom na sinda mababayaran sagkod sa katapusan kan taon.

Mayo pa nin pahayag si DPWH Region V Regional Director Virgilio C. Eduarte mapadapit sa problemang ini.

Trending

Powered by Blogger.