Thursday, December 6, 2018

Mga empleado, opisyal kan Libmanan, mayong sweldo

Brioso asin Bulaong
LIBMANAN, Camarines Sur (Bicol Standard) -- Hasta ngonian, natatakloban pa nin makuring problema an mga empleado kan Libmanan, Camarines Sur, nin huli ta duwa an nag-hihingako na sinda an hefe ejecutibo kan banwaan.

Si Mayor Bernard Brioso, an elihidong alkalde kan banwaan na ini, liwat dinuholan nin "preventive suspension" kan Sangguniang Panlalawigan, nin huli sa reklamo na pig sangat contra saiya.

Apisar kan "preventive suspension" na ini, habo niyang bayaan an tukawan kan Oficina kan Alkalde, asin padagos na nakikitusayan, sa argumento na habo niyang sunodon an sinambit na kasuguan.

Sa ibong na lado si Vice Mayor Rommel Bulaong, na iyo an dapat mag asumir bilang acting na alkalde, nin huli kan suspension ki Brioso, dai man nakaka functionar, hastang sinusurat an baretang ini.

An problema: hasta ngonian na aldaw, an mga empleado kan Libmanan, dai pa nakakakobre kan saindang sweldo asin beneficio bilang empleado nin huli sa kariribongan kun sisay an dapat mag ehirsir kan poder kan Oficina kan Alkalde.

Mismong an opisina kan Municipal Local Government Operations Officer an dai nakaka desisyon kun sisay sa duwa -- si Brioso o Bulaong an dapat mag functionar, bilang hefe ejecutibo kan banwaan.

Siring man, segun sa nagunong report, an depositary bank kan banwaan an nag iibitar na honrahon an firma kan duwa, mientras na naghahalat suboot sinda nin legal na basehan, kun sisay sa duwa an awtorisado na mag firma sa checke kan banwaan.

Ini pig confirmar ni Mun. Kgd. Jess Camara sa entrevista kan Bicol Standard.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...