Thursday, December 6, 2018

Lalaki nagkakan katoy nin butete, gadan

File photo - Bicol Standard

NAGA CITY (Bicol Standard) -- Dai na nakalibre sa kagadanan si Joseph Lebantino, 27 anyos na residente kan Brgy. Dalupaon, Pasacao, Camarines Sur pakatapos na magkakan nin katoy nin butete o tikong.

Segun sa informasyon na hale sa ama kan biktima na si Rolando Lebantino, linuto guiraray ni Joseph an inapon na nganing katoy kan sira.

Haros taon-taon igwa nin napipiligrohan na tawo na nagagadan sa pag kakan nin tikong, nin huli ta dai sinda nag aaram na peligroso an pagkakan kan katoy kaini o kan ibang parte kan menudencia, na digdi naka concentrar an hilo.

Antes na linuto kan biktima an katoy, nagpatanid pa suboot ini sa mga aki sa Dalupaon na dai magkakan kan tikong o butete, na pwede sindang magadan.

Pirang minutos sana pakatapos na hamlian kan biktima an katoy kan butete, nagkulog na tulos an saiyang tulak, nagkaigwa nin halangkaw na kalintura, nagturoog an saiyang lawas, kaya pig probaran pang darahon sa hospital.

Pag abot sa doctor, pig declarar siya na "dead on arrival."

Mientrastanto, binabasol na naman an Bureau of Fisheries and Acquatic Resources (BFAR) sa Bicol ta pirme na sanang nadadakop na turog sa saindang obligasyon na mag informar sa mga tawo, dapit sa siring na peligro.

Kada bulan na Noviembre, Disyembre, Enero hasta Pebrero, iyo an panahon na nag pipiga an butete o tikong, kaya mataba asin darakula an katoy asin piga kaini, na nakakahilo, kun makakan nin tawo.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...