Friday, November 30, 2018

Online selling kan marijuana, pigbabantayan kan Naga PNP

Stock photo hale sa Pixabay
NAGA CITY (Bicol Standard) – Pigbabantayan na kan Naga City PNP an online selling kan ilegal na droga, orog na an marijuana, sa ciudad na ini.

Segun ki SPO2 Toby Bongon, tagapagtaram kan Naga City Police Office, bako na sanang sa mga madiklom na kanto an paboritong lugar kun sain nangyayari an transaksyon kan marijuana.

Ini nakaabot na sa Internet, kun sain ginagamit an mga social network sa pakipag-olay sa mga customer.

Sabi ni Bongon, ini an modus operandi kan suspechado na si Ricky Chiu y Francia kan Zone 5, Filoville Subdivision, Jade Street, Barangay Caluag, sa ciudad na ini.

Si Chiu nadakop kan sarong aldaw kan magsagin-sagin na poseur buyer an pulis asin magbakal nin kantidad P600 na pinaalang na dahon nin marijuana.

Afuera ki Chiu, nahulog pa sa kamot kan mga autoridad an nagkapirang mga persona na nasa tahaw kan sarong pot session sa harong ni Chiu.

An mga ini iyo sinda: Christian Jay Rodriguez y Buenaflor kan Goa, Raymond Nacario y Carmona kan Pili, Henry Keith Amaro y Monge kan Naga City, asin Raymond Magallones y Alarte kan Naga City.

Maroromdoman na kan nakaaging semana, dakol an nadakop sa Bicol sa paggamit asin pagpabakal nin marijuana.

Mientrastanto, nagpatanid an Naga City Police Office na mas pinaisog pa an kampanya kontra sa gabos na klase nin ilegal na droga.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...