Friday, November 23, 2018

Babae, biktima nin budol-budol sa Albay


NAGA CITY (Bicol Standard) - Saro na naman na 57 anyos na balong babae an biktima kan budol-budol na nag-operar sa Daraga, Albay.

An biktima iyo si Ligaya Narvaez y Castillo, taga Brgy. Quirangay, Camalig, Albay, alagad nag eerok na ngonian sa Brgy. Market Site, Daraga.

Sa sumbong ni Narvaez sa pulis, mientras na nagbabakal siya nin mga gulayon, nagdulok saiya an 2ng dai niya bistong babae asin nag-olay-olay sinda sa awto kan suspechado.

An vehiculo pig mamaneho nin sarong lalaki na dai bisto kan biktima.

Mantang sinda nag eestoryahan kan enot na babae na saiyang naka olay, nagdulok an saro pang babae asin lalaki asin naki sali sa saindang estoryahan.

Dai maaraman ni Narvaez kun tano ta marikasong siyang na combensir kan saiyang mga kaolay na itao an saiyang Samsung J6, 2ng singsing, sarong kulentas, asin an kantidad na P20,000 na cash.

An karibay kan saiyang mga itinaong gamit sa mga dai bistong kaolay iyo an suboot kantidad P150,000 na cash na nasa laog kan clutch bag.

Marikas si mga pangyayari kaya pirang minutos sana tapos na si saindang pag orolay.

Kan solo na sana siya, hiniling kan biktima an laog kan clutch bag na si pagtubod niya dakulang
kantidad nin cuarta.

Nag ngalas asin haros madismayo an biktima kan mareparo niyang an laog palan mga tinarabas na papel.

Dai na naheling kan biktima si duwang babae asin duwa man na lalaki na nakaolay na niya, kan mangyari an krimen.

An incidenteng ini iyo an pinaka bago sa serye nin mga budol-budol na marikas na nagdadakul an biktima, pag entra sana kan bulan na Nobiembre 2018.

Nagpapadagos an imbestigasyon kan casong ini.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...