Tuesday, November 6, 2018

Agom na babae, ina, pinokpok sa payo kan agom sa Bula, CSur



NAGA CITY (Bicol Standard) - Naglansar nin hot pursuit operation an mga miembros kan PNP sa Bula, Camarines Sur tanganing arestaron si Joey Cariaga, may agom asin residente kan Brgy. Sagrada sa banwaan na ini.

Si Cariaga iyo an pig tutukdong nag gadan kan saiyang agom na si Noime Cariaga, 40, asin kan ina ni Noemi na si Florencia Antioquia, 80 anyos.

Segun ki P/Sr. Insp. Rustom Dela Torre, an hepe kan Bula PNP, an krimen nangyari sa pag-oltanan kan alas 10:00 na bangui, kasubangui (Nov 5) hasta alas 7:00 nin aga, ngonian na aldaw (Nov 6).

Nagluluwas sa mga nagunong informasyon kan mga awtoridad na an suspechado nakipag inuman pa kasubangui sa saiyang mga kaamigo. Enot ining nagpaaram na mapuli para areglaron an dai ninda pagka-intindihan sagkod an saiyang agom na si Noime.

Mayo nin naka risa kan incidente ta mamusog si hugnak kan uran kan nasambit nang mga oras, kaya aga na kan maaraman an nangyari.

Kan nadiscubre an krimen si Noemi haros dai na mabisto nin huli sa mga tama sa saiyang payo , lalawgon asin ibang parte kan lawas.

An ina ni Noemi na si Florencia, igwa man nin tama sa saiyang payo, na sabi kan mga imbestigador, pinokpok nin kahoy.

Saro sa mga pigtutubodan na causa kan krimen iyo an pag selos kan agom na lalaki sa saiyang agom, na pwedeng iyo an guinikanan kan saindang iwal.

Idinagdag kan pulis na sasangatan nin casong murder asin parricide an suspechado nin huli sa pag gadan kan saiyang agom asin sa ina kan saiyang misis.
Share:

Featured Post

Bicol PNP nabs 2,701 in anti-illegal gambling ops

LEGAZPI CITY -- For the past three quarters covering the period from January-September this year, a total of 1,079 positive illegal gam...