Saturday, November 17, 2018

6 na pulis nalugadan sa ambush sa Libmanan


NAGA CITY 11/17/18- (Bicol Standard) Anom (6) na pulis na miembros kan Police Mobile Force Company (PMFC) an nalugadan kan sinda ambuson kan dai madeterminaran na numero nin mga rebeldeng New People's Army (NPA) kasubagong hapon.

Nangyari an ambush alas 4:30 nin hapon sa Sitio Patag, Mambulo Nuevo, Libmanan, Camarines Sur.

Segun sa informasyon, an siyam (9) katawong miembros kan Camarines Sur PMFC, pinapamayohan ni PO3 Jason G. Canoto pasiring sa Libmanan proper hale sa joint medical mission.

An sponsor kan medical mission iyo an 9th IB, 9th ID kan Philippine Army asin Medical Doctors kan Bicol Medical Center.

Hale pa sana sinda sa Brgy. Bagamelon, Libmanan, Camarines Sur, na kun saen duman ginibo an misyon nin pagbulong.

Sabi kan imbestigador nagpabuag nin Improvised Explosive Devise (IED) an mga rebelde, kaya nagbalos nin putok an mga pulis.

Pirang minutos sana an nakalihis, nagdurulag na an mga rebelde pasiring sa dae madeterminaran na direksyon.

Mientrastanto, huli sa sinambit na incidente, anom (6) na pulis an nalugadan asin pigbubulong ngonian sa Mother Seton Hospital digdi.

An mga biktima iyo sinda: PO3 Roland G. Hermogeno; PO1 Vladimir Guadalupe; PO1 Roy V. Carbonell; PO1 Eliseo Jomar N. Palaroan; PO1 Daisy Bhel Genova; asin si PO1 Mikhail Jose P. Concina.

Nagpapadagos an operasyon ngonian kan PNP asin AFP sa sinambit na lugar.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...