Saturday, November 17, 2018

14ng pasahero sa jeep na nahulog sa Tinambac, salbado na


TINAMBAC, CSur - Binasol ni Municipal Councilor Jonas Soltes an Department of Public Works and Highways (DPWH) sa saindang kapabayaan na pakarayon an tulay na mina konektar sa Brgy. Binalay asin Brgy. Olag Pequeno, sa banwaan na ini, na iyo na rason sa aksidente na nagresulta sa pagkahulog kan pampasaherong jeep sa tulay.

Segun sa report, 14ng pasahero an biktima sa aksidente, sabi ni Lance Dexter Baloyo na saro sa mga biktima.

Ipinahayag ni Baloyo na mantang nagdadalagan an pampasaherong jeep, bigla na sanang napondo an makina kan awto mientras na nagbabaktas sa tulay, na patukad sa Brgy. Binalay asin Brgy. Olag Pequeno.

Huli kan pag pondo kan makina, naghuros pa-atras an awto sagkod na mawaran nin kontrol an driver kaya nahulog sa sapa an vehiculo.

Nagluluwas sa bareta na bako ini an primerong aksidente na nangyari sa lugar, nin huli ta pira nang tawo an binawian nin buhay, sa mga kapareyong aksidente sa lugar.

May plano an Sangguniang Bayan kan banwaan na ini na imbitaran guiraray an representante kan DPWH sa Partido tangani na maaraman kun igwa nin plano an sinambit na ahensiya sa paghiraray kan peligrosong tulay.
Share:

Featured Post

TEACHER CORNER | In reading, hope springs

Esteban B. Camano Master Teacher II Gen.T. De Leon National High School The wide spread of illiteracy is still one of the world’s bigge...