Sunday, October 14, 2018

Gov Cua: Mayong problema kun si PCI Espedido distino sa Catanduanes

Gov. Cua

LEGAZPI CITY (Bicol Standard) -Mayo nin naheheling na problema si Catanduanes Governor Joseph Cua sa nagluwas na bareta na madidistino sa saindang provincia an controversial na si Police Chief Inspector Jovie Espenido. Ini an saiyang enot na pahayag sa intrevista kan mga miembros kan media.

Sabi ni Cua dai dapat tawan nin maraot na kahulugan an siring na desisyon kan Philippine National Police (PNP), orog na kan mga nagpapalakop nin mga opinyon sa social media.

Inako kan gobernador na enot pa kaini, nagpadara siya nin surat ki Bicol PNP Regional Director Arnel Escobal para maghagad nin listahan kan mga pangaran na pwedeng pag pilian kan magiging bagong provincial director kan pulis sa saindang provincia.

Mientrastanto, sa parte ni Espenido dai man dapat ikahadit kan mga tawo an saiyang presencia, ta maski pa igwa siya nin mga inaatubang na asunto sa jusgado, dai pa nin desisyon kun siya may sala o mayo sa akusasyon.

Hastang sinusurat an baretang ini, dai pa ma sierto kun anong pwesto an saiyang pupugolan sa Catanduanes.

Si Espenido may rangong Chief Inspector, asin an kaipohan na magpugol kan pwesto bilang PNP Provincial Director, dapat P/Superintendent o P/Sr. Superintendent.

Maroromdoman na an Catanduanes naging controversial kan enot na mga taon nin huli sa pagka discubre kan Mega Shabu Laboratory sa Brgy. Palta Small, sa banwaan kan Virac.

An nasambit na caso pig dadangog pa ngonian sa jusgado.
Share:

Featured Post

Duterte condoles with families of slain, wounded Bicol cops, soldiers

Bicol Standard photo NAGA CITY (Bicol Standard) – President Rodrigo Duterte led the awarding of medals to members of the police and arm...