Naaraman na kabale sa mga rason kan paglangkaw kan inflation iyo an pagbago sa supply kan karne, gulay, sira asin bagas.
Segun ki NFA Bicol Directore Henry Tristeza na an minimum na pwedeng ipabakal sa mga parokyano limang kilo na. Kun harayo an pig halean kan parabakal pwede pang dugangan an pwedeng ipabakal saiya.
An target kan NFA ngonian iyo an mapababa sagkod sa 4% an inflation rate sa Bicol sa laog nin tulong bulan, depende sa magiging effecto kan pagdoble kan pag release kan bagas na ipapabakal sa mercado.
Sinabi sa bareta na nag-momonitor ngonian kan sinambit na officina sa mga outlets na nagpapabakal nin NFA rice, na dapat an retail price P27 asin P32 an kada kilo. Kun maprobaran na mas mahal digdi an saindang presyo, igwa nin nakahandang kastigo, sa lindong kan kan inaapod na "one strike policy," sabi pa.
Pinara kan nasambit na opisina an paghadit na magkakaigwa nin pagkulang-kulang kan supply nin bagas, nin huli ta dakul an i-didiscargang bagas hale sa barko na nakadoong ngonian sa Tabaco Port.
