Tuesday, September 18, 2018

Rep Bordado, makandidatong alkalde kan Naga?

Bordado

NAGA CITY (Bicol Standard) -- Mayo pa nin desisyon kun ano an proceso na i-aadoptar sa pagpili kan magiging panlaban na kandidato kan Team Naga sa election sa masunod na taon.

Ini an pig confirmar ni City Councilor Lito del Rosario sa intrevista kan Bicol Standard kasuodma.

Segun ki Del Rosario tulong beses na sindang nag meeting kahampang si VP Leni Robredo para sa bagay na ini para hamanon an guidelines sa pagpili nin mga kandidato.

An solamenteng nag bago iyo an pag lataw kan pangaran ni 3rd district Cong. Gabby Bordado na sinasabing interesado nang magdalagan bilang alkalde kan ciudad.

Pig linaw kan consejal na an mga desididong mag ayon sa listahan kan pag pipilian sa cargong alkalde iyo man guiraray si VM Nelson Legacion asin City Councilor Nene De Asis asin ngonian, pwedeng si Bordado.

Idinagdag ni Del Rosario na sa maabot na Sabado (Sept. 22) magkakaigwa liwat sinda nin meeting para sa bagay na ini.

Kabale pa sa agenda iyo an pagpili kan mga makarandidatong consejal sa lindong kan grupo ninda.

Kasubago, si Legacion nagsabi sa mga miembros kan media na habo na ngona niyang magsimbag sa hapot dapit sa politika, bastang determinado na suboot siyang magkandidatong alkalde kan ciudad.

Enot pa kaini, nagluwas na sa media an bareta na pig promisahan na siya kan saiyang mga pagiriba sa Team Naga, na siya na an kan grupo para alkalde, sa nagdadangadang na election.

Si Bordado mayo pa nin pahayag o pahimutik dapit sa bagay na ini.
Share:

Featured Post

Duterte condoles with families of slain, wounded Bicol cops, soldiers

Bicol Standard photo NAGA CITY (Bicol Standard) – President Rodrigo Duterte led the awarding of medals to members of the police and arm...