Quack dentist, dinakop sa Naga City

Photo courtesy of Dr. Albeus

NAGA CITY (Bicol Standard) -- Sarong quack dentist an rinamalan kan mga pulis pakatapos na siya magpamalo-malong dentista asin nag gagabot nin ngipon sa sidewalk kan Caceres St. digdi.

Sa entrevista ki Dr. Jess Albeus, na official kan Philippine Dental Association, saiyang sinabi na an quack dentist iyo si Alfonso Villanueva, 42, taga Brgy. Magurang, Polangui, Albay.

Nadakop siya kan mga awtoridad mientras na nag bubulong nin sarong lalaki na may makulog na ngipon, sa guilid sana kan tinampo.

An patubod ni Villanueva, siya sarong espiratista na may pambihira na kabatiran sa pag-gabot nin ngipon.

Igwa siyang ipig papaheling na mga "amulet" o anting-anting, na pinamana pa suboot saiya kan saiyang mga ninono kan saindang familya.

Photo courtesy of Dr. Albeus

Kaibahan sa pag dakop ki Villanueva iyo si Dr. Jonathan Lopez, an Chairman kan Committee on Illegal Practice, na official kan Philippine Dental Association (PDA).

Binitbit kan pulis si Villanueva pasiring sa hepatura kan pulis, asin ngonian na aldaw sasangatan nin caso sa jusgado.

An caso niya iyo an pagbalga kan RA 9484, na mas bisto sa apod na Philippine Dental Act of 2007.
Direktang isasangat an caso sa korte ta nadakop siya sa akto na nagbabalga kan ley.

Photo courtesy of Dr. Albeus