Saturday, September 15, 2018

Aika Robredo for Mayor kan Naga City?

Aika Robredo

NAGA CITY (Bicol Standard) -- Ngonian na aldaw nakatalaan na gibohon an pag orolay kan mga oficial kan Team Naga asin ni Vice Presidente Leni Robredo.

An obheto kan orolay, para determinaran an processo kan pagpili kan magiging standard bearer kan saindang grupo sa cargong alkalde para sa nag dadangadang na election sa Mayo, sa masunod na taon.

Sabi ni Alkalde John Bongat, an meeting dapat nangyari kan Viernes pa, kan sarong semana.

Pero pig oktaba ni VP Robredo huli ta kulang si saiyang panahon ta dapat magbwelta sa Manila kan kapareyong aldaw.

Maroromdoman na enot pa kaini aram na kan mga oficial kan Ciudad na si VM Nelson Legacion an pinangakoan mamanokon bilang alkalde.

Igwa nin confirmasyon an baretang ini sa mga interview ki Mayor John Bongat, na si Legacion iyo an saindang magiging panlaban.

Mientrastanto,, kan naka aging duwang semana, pakatapos na magbungkaras an controversiya sa STL asin sa pagpa arkila kan Plaza Rizal, nagkaigwa nin bagong huyop nin duros sa politika sa Naga.

Nag declarar si City Councilor Nene De Asis na determinado siyang magkandidato bilang alkalde kan Ciudad.

Sabi sa report, tangani suboot na maibitaran an pagka-buruwag kan grupong Team Naga, mapatahaw si VP Robredo, para areglaron problema.

Hale sa informante sa City Hall, nag alisngaw an bareta na may desenyo sa politika na hale ki Robredo.

An recomendasyon, dapat mag conducir lugod nin survey para aramon kun sisay sa duwa, an popular, ta iyo an bebendisyonan na magdalagan.

Si Concilor de Asis nagpahayag sa media na makusog an saiyang pagtubod na kun si Legacion an tatambodan, dakula an posibilidad na mapipiligrohan kan saiyang kalaban.

Pig ngisihan sana ini ni VM Legacion.

Sa ibong na lado, an negosyanteng si Tato Mendoza nag confirmar kan sarong aldaw sana, na dagos man guiraray siya sa pag dalagan bilang alkalde kan Ciudad.

Si Mendoza maroromdoman na kontra ki Legacion, nin huli sa dakul na mga rason.

May informasyon man na kun dai magkasundo si VM Legacion asin si Consejal Nene de Asis sa proceso kan pagpili kan kandidato kan Team Naga, si Aika Robredo an mabutwang ilalaban bilang alkalde kan ciudad.

Enot pa kaini nagsabi si Aika Robredo na dai siya interesado na magkandidato sa maabot na pirilian.
Share:

Featured Post

PRO5 - PO1 PASSERS OF PHYSICAL, MEDICAL & DENTAL EXAMINATIONS

Police Regional Office 5 1st Cycle of CY 2018 Police Officer One (PO1) Regular & Attrtion Recruitment Program PASSERS OF PHYSI...