Virac, nasa 'state of calamity'

Magkatabang na pinagset-up kan mga personahes kan Virac MDRRMO asin Philippine Red Cross an Water Filtration System sa salog kan barangay Hicming tanganing makaprodusir nin malinig na inumon na tubig para sa pangangaipo kan mga konstituwentes. (Go Shine Virac)

VIRAC (Bicol Standard) -- Dagos na mananggad na pig declarar na nasa lindong kan state of calamity an banwaan kan Virac, Catanduanes, nin huli sa pira nang aldaw na na-experienciahan na pagkulang-kulang nin tubig na inomon.

Nanotaran kan gobierno lokal kan Virac na nagbaba na maray an lebel kan water sources sa lugar.

Pig confirmar ni Mayor Samuel Laynes na pinirmahan na niya an resolution na nagdedeclar sa Virac na nasa lindong kan state of calamity.

Mientrastanto, sabi sa report kan Municipal Disaster Risk Reduction and Management Office (MDRRMO) kan Virac, 11ng barangay councils kan Virac an nag aprobar nin resolution na naghohorot na kaipohan na magkaigwa nin siring na declarasyon.

An mga afectadong barangay iyo itong mga namumugtak sa sentro kan cabeserang banwaan na nakukua nin supply nin inomon na tubig sa duwa kan tulong water sources na iyo an Paturog asin Sibanjan.

Afuera kan kasakitan na makakua nin supply nin inomon na tubig, an mga tinanom anas nang luyos, asin an gatak kan daga risa na.